中環在線:基點創辦人重出江湖 - 李華華

中環在線:基點創辦人重出江湖 - 李華華

英國記者MichaelLawes喺1992年創辦嘅《基點》(BasisPoint),專門報道貸款債市新聞,係財金界一本頗具份量嘅財經周刊。華華日前同Michael傾偈,得知佢靜極思動,籌備明年初推出網上平台「instanter.com」,同舊舖及其他通訊社對撼,為市場再掀新氣象。

03年收山去扶貧

50出頭嘅Michael,本身就係金融市場上一個傳奇。佢老哥廿幾年前由英國來港工作,擔任財經雜誌《IFR》駐港記者,報道貸款融資消息,92年onemanband創辦《基點》,同《IFR》直接競爭。《基點》其後一紙風行,報道範圍擴大到提供金融數據服務產品。
10年前,佢忽然急流勇退,將《基點》善價沽售畀Reuters旗下嘅LPC,賺咗唔少,佢喺《基點》留任至03年正式收山,從此逍遙自在,去山區扶貧。華華早前喺北京,同賓架吹水,仲有人講起呢件當年佳話,足見佢個「朵」喺資本市場幾咁響。

搞網站instanter

但時移勢易,佢突然復出,何解呢?Michael話,係希望帶嚟競爭同進步,「冇競爭嘅市場,唔係一個健康嘅市場」。
08年Reuters同Thomson合併,成為全球最大金融服務供應商ThomsonReutersLPC。Thomson旗下《IFR》同《基點》嘅關係,由競爭對手變為兄弟機構,從此兩雄分工,《基點》只報道銀團貸款,前者就專攻債務同股本融資新聞。
Michael正試推嘅新網站名為「instanter」,意思係坐言起行,事不宜遲。呢位以香港為家嘅英國記者,休養生息8年,其間娶妻生子,估唔到咁多年後仲有一團火,令華華肅然起敬。

李華華
mailto:[email protected]