對於歷史悠久、形象獨特鮮明的車系，求變時有一定局限性，變得過火便受批評。好似標籤着Man味十足的越野王LandRover，首次破格推出迷你版越野車RangeRoverEvoque，好多車迷話感覺失真，但不忠原著的設計，更成功俘虜女性市場，這正正是LandRover所想所要的創新未來。
記者：許維雅
攝影：黃子偉
Model：Rika@GME
型爆外形
早於08年日內瓦車展所展出的LRX概念車，已有RangeRoverEvoque的雛型，至09年廠方拍板生產，決心打造一架最細最輕及最具效能的迷你版RangeRover，從此便迴響不絕。等了又等，今日終殺到香港，成為剛易手的香港代理之揭幕頭炮。
Evoque備有三門版Coupe及五門版兩款型號，香港將發售Pure普通版及Dynamic頂級版，我率先試駕這部紅身白頂三門Dynamic版本，只有貴版才可揀黑、白或銀色頂玩撞色。
標誌着LandRover創新不忠原著方向的Evoque，無論從車頭、車尾還是車側看，都令我大讚：「真係好靚仔！」長闊高只有4,365×2,125×1,635mm，較家族兄弟大大縮水，配合下身方上身扁的流線構造，C柱極短令車頂尾部向下傾的前衞造型，的確既Trendy又Sporty。再望充滿肌肉感的車頭、Xenon頭燈配刀片式LED燈組合、亮黑蜂巢鬼面罩，與概念車有九成相似。
五眼關七
內櫳保持一貫豪華格局，但加了新元素。着車一刻，中控台上的旋轉按鈕會升起變成波棍，8吋大輕觸式屏幕有音響及免提藍芽，還有5個鏡頭可360度環顧四周，鏡頭置於車頭兩角、兩邊側鏡及車尾。車廂內的燈光可自行選色，更可調校光暗度，每處設計都盡顯心思。
要打造細又輕的越野車，全新Si4引擎都減磅，車重得1,640公斤。2公升高壓燃油噴注引擎配合爆發力強的Turbocharging，發揮出低轉大扭力表現，極速217km/h、0-100km/h加速只需7.6秒，油耗8.7L/100km。唔好以為它變了樣就無功能可言，同樣加入五種行車模式，還有大堆制動系統及循迹穩定系統，令睇得又玩得的Evoque，有本事吸引年輕人及女性這個新市場。
RangeRoverEvoque
引擎：2,000ccSi4Turbocharging
馬力：240ps/5,500rpm
扭力：340Nm/1,750rpm
傳動：6速自動波連+/-
售價：$788,000（三門Dynamic版）
查詢：28917780（LandRoverHK）