老牌經典漫畫《龍珠》，故事同角色，玩家當然滾瓜爛熟，新作《DragonBallUltimateBlast》當然唔少得佢哋出手。遊戲除咗包含原作經典場景故事外，仲新增自創角色玩法，同會變巨型巨猿嘅比達、悟空隻揪，改寫吓廿幾年嚟嘅劇情！
記者：許福合
巨型Boss戰夠刺激
今集叫《UltimateBlast》，譯即終極爆破，玩完遊戲覺得真係幾貼切，龍珠角色們的出招效果華麗，下下殺招真係爆到七彩，而且角色移動同出招，會有不同大特寫去配搭，令玩家除咗有真實感之餘，有時真係玩到好似睇緊《龍珠》卡通咁過癮！最刺激係巨型頭目戰，會出現由比達變身而成嘅巨猿，鏡頭上的大小差異，可感受到那種壓迫感，尤其巨猿一腳踩埋嚟，真係避到手心出汗！看準機會造成一定傷害後，畫面中間會出現QTE出招指示，成功輸入便會跟番原著咁終結敵人。
出絕技打爆地下
與一般格鬥遊戲死板場景不同，對戰時可上天下地，當動用究極技時，仲會按威力造成環境破壞，例如悟空變身「超西」出招，就會造成地面巨大裂縫，夠爽快！當連續攻擊命中，就可以發動StrikeMove，鏡頭變成大頭，玩家可以選擇需要大力氣，但可造成超強傷害的「強攻」，「弱攻」就會用能量彈來消減對方氣力，屬基本戰術攻擊。因為漫畫中，主角們基本上有齊長短火攻擊，戰鬥時會自動根據攻擊距離，轉換出招，距離遠就會出波或能量彈，近戰時連續出招可使用拳腳連續技，打起來簡單得多。
想搞吓新意思，仲可自己設計角色加入戰場，玩家可以選擇角色造型，包括髮型、顏色、膚色及衣服等，而技能同究極技都可自己選擇，最正係自訂角色在連線對戰時亦適用。不過遊戲嘅集氣系統，就令人有綁手綁腳嘅感覺，當防禦時，用來硬擋能量彈，成功率不高，而且因為連續技要擊中，還要看對方招式，不一定能成功連招，即連不到招就集不到氣，那這場就捱打居多了。
Profile
主機：PS3/XB360
類型：動作
發售：12月8日
廠商：NAMCOBANDAIGames
官網： http://b.bngi-channel.jp/dba/