地產Ｓ嫁女，在理工大學附屬酒店ICON擺酒，事先送來請帖，既與佢相識多年，點都要出席啦，雖則明知道冇嘢食，並非話地產Ｓ唔請食飯，事實係，當今香港婚宴，全是五時恭候，八時入席，九時半後如果程序冇阻滯、冇超時嘅話，先至有得食，偏偏左丁山逢出外吃晚飯，都係九時後告退嘅。幾年來參加晚上婚宴嘅話，梗係要在家菲傭煮定即食麵，這晚也不例外。但有一事諗唔到嘅，就係民建聯高層譚耀宗、李慧琼兩位議員在座，左丁山乘機問譚耀宗：「民建聯撐唐定撐梁？」譚主席話：「仲有好長日子先至到三月二十五號，我地寫好咗一份『對特首的期望』，送俾唐生梁生，希望佢地回應，目前我地唔會表態，唔係咁急嘅啫，大把時間。」後來地產Ｓ經過我地張枱，譚主席即刻與佢咬耳仔，細細聲講：「撐唐、撐梁，俾記者問到，唔好表態呀！」點解要同地產Ｓ講呢？譚主席話：「Ｓ先生係民建聯中常委。」哦，原來地產Ｓ咁高地位，失敬晒。
九時十分，婚宴司儀先至宣佈請大家睇新郎新娘小時候錄影，左丁山趁機請辭，返屋企食一丁麵。
到咗星期日，民建聯高層黃定光議員出席梁振英參選大會，唔通譚主席冇同黃議員咬過耳仔？後來民建聯及黃議員話，黃議員係以中華出口商會代表名義參加大會嘅，不代表民建聯，但已令人見到，愛國建制派並非鐵板一塊，傾向挺梁者可以「自由行事」，當然各人有不同政治理念，可以根據自己理念去支持任何一位候選人，但甚麼政黨嘅黨員都要根據黨的政策投票，否則就要退黨，英國如此，美國如是，德國亦然，只有香港啲政黨因為先天不足，先至管理鬆散，黨員發言一時以黨員身份，一時以私人身份，睇到大眾眼花瞭亂！
兩位仁兄正式宣佈參選，有個好處，就係梁營唐營人士立即曝光，唔駛靠估，梁營造勢大會上，憑電視畫面所見，起碼有十幾二十名多年朋友、校友，個個都係靠自己努力，考上大學而成為高級專業人士嘅，佢地願意支持梁生競選，好有承擔，唔係等指示辦事，左丁山向佢地致敬。