「對唔住呀！」大家冇聽錯，呢句話係出自曼聯領隊費格遜把口。曼聯前晚喺英聯盃8強主場對英冠中游球隊水晶宮，老費鬼咁老定，又搵班副選去踢，結果就出事，爆大冷喺加時輸1:2；賽後老費即刻扮死狗，公開同球迷謝罪。
前晚老費又派啲二線兵落場打英聯盃，但睇番個陣，有9個係國腳，包括基斯史摩寧、莊尼伊雲斯、朴智星同貝碧托夫等，不過，呢支紅魔二隊踢落唔對辦，踢到65分鐘俾岩布斯離門35碼射入而落後0:1；雖然馬捷達4分鐘後入12碼扳平，令賽事進入加時，但格連梅利喺98分鐘為水晶宮奠勝兼助球隊22年來首次喺奧脫福贏波，最終令紅魔輸1:2出局。
曼聯向來唔重視英聯盃，跌咗原本冇乜大不了，但弊在喺主場俾支低組別球隊擯出局，所以老費賽後亦要認低威。老費話：「我唔知點解會咁，踢嚟完全唔似曼聯，我真係好失望。我哋控球時間好多，可惜就做唔到嘢。我要向球迷講聲對唔住。」老費亦好有風度咁話：「其實水晶宮亦打得好好，希望佢哋入到決賽啦！」
曼城紅軍4強相遇
水晶宮淘汰完曼聯之後亦行運，4強（喺下年1月9號同23號嗰個禮拜上演）抽籤避開兩大英超勁旅曼城同利物浦，只係同同級隊伍卡迪夫城爭入決賽。水晶宮領隊費列文話：「今晚好美妙，我以自己班球員為榮。不過，卡迪夫城都好難打。」呢個抽籤結果，相信令好多球迷失望，原本大家期望近年擴軍最狠嘅曼城同利物浦會合演夢幻盃仔決賽，家陣佢哋兩隊喺4強就對，好冇癮囉！
話時話，水晶宮雖則揚威奧脫福，但今晚要喺英冠迎打比郡，3日打兩場，我求大俠就睇吓佢哋係乘勝追擊，定係大戰過後筋疲力竭。