今屆特首選委會選舉仲有一個星期左右就投票，由於「豬狼戰」打到㷫烚烚，唐、梁兩營候選人都全力拉票，真係搶多一個位得一個位。其中喺會計界入面，盛傳係唐唐謀臣胡定旭力撐嘅「A16聯盟」團隊，成班Big4會計師同業界重量級人馬出晒嚟選，選舉工程搞得甚有睇頭，真係未選都贏咗個勢。有業界中人同八方講，團隊入面嘅劉遵義太太、畢馬威會計師事務所合夥人麥嘉軒落足力拉票，有人開始估，佢點只想贏咁簡單，背後一定大有文章！
有人話佢部署踩入立會
其中一個講法係，麥嘉軒想做會計界票后！稱王封后呢樣嘢不過係虛名，有人話佢嘅真正目的係要試票，為出年選立法會、搶陳茂波會計界功能組別個位部署。咁講唔係冇道理，事關係人都知陳茂波挺CY，如果今次CY選唔到特首，正所謂「西瓜靠大邊」，挺唐嘅麥嘉軒如果出嚟選立法會，陳茂波都咪話唔危，而且今次「A16聯盟」擺明同陳茂波支持嘅80後會計界青年團隊鬥搶票，更加令業界覺得麥嘉軒試票味濃。
不過又有業界人士話，麥嘉軒雖然志在添馬艦，但係未必係想入立法會大樓，而係想行多兩步，入隔籬政府總部至真。咁樣講有迹可尋，話說08年金融海嘯之後，煲呔成立經濟機遇委員會，第一時間招攬麥嘉軒，除咗令佢識到老公劉遵義之外，仲令佢有機會俾政府中人認識。除咗當年做委員會副主席嘅財爺鬍鬚曾欣賞佢之外，據聞連當時做政務司司長嘅唐唐都對佢嘅能力印象深刻！
拍住老公劉遵義講經濟
有業界人士話，若然麥嘉軒高票當選會計界選委，以佢老公劉遵義今日貴為阿爺幕後經濟智囊嘅身份，麥嘉軒要入唐唐管治班子做局長，政治上絕對過到關，唯一問題係麥嘉軒始終係會計師，做宏觀政策掂唔掂，真係唔知！不過有人叫八方少擔心，其實近期麥嘉軒成日拍住老公劉遵義喺《信報》發表鴻文分析宏觀經濟，以示熟悉經濟政策，做個小小局長又有何難？麥嘉軒係「哥哥」張國榮外甥女，呢粒政壇新星值得留意。
mailto:[email protected]