新城DJ范振鋒（Ricky）和無綫小花李思欣將於明年1月15日在香港結婚，但據知因有免費贊助去關島拍旅遊特輯，兩人因利乘便將婚期推前到「128」（12月8日）在當地註冊，兩人前晚被發現臨急臨忙去婚紗店攞禮服，對此思欣否認為慳錢，笑言：「只希望有個難忘回憶。」
李思欣原定明年才下嫁范振鋒，但據知Ricky最近經朋友搭路，獲關島政府贊助去當地拍旅遊特輯，兼順道推廣結婚註冊服務，Ricky與思欣因利乘便，決定將註冊儀式移師到關島舉行，並揀定「128」（12月8日）這好日子，上述特輯更會拍攝兩人的結婚過程。
新郎嫌唐裝搶眼
據知，大隊大後日便出發，由於時間倉卒，Dicky和思欣的親友都未能同行，而一對新人前日傍晚被發現行色匆匆到九龍塘法國婚紗店試衫。思欣甫入店已有兩名店員遞上多套裙褂，思欣試完第一套已合心水。之後店員拿了一套唐裝衫給Ricky，但未知是否嫌顏色又黃又紅太搶眼，Ricky不肯試上身，最後連挑幾套西式禮服，並要求店員包起，預計是到關島結婚之用。
離開婚紗店後，Ricky與思欣驅車往九龍城行街，沿途十指緊扣，睇完地產舖又睇金飾店，他們在金舖外看了一會，舖頭突然關門，令思欣扁晒嘴，Ricky為思欣，即走入一間出名貴的生果店，買了一杯鮮榨果汁兩份飲，既甜蜜又慳錢。
嘆父母未能見證
記者之後致電思欣，她直認婚期有變：「關島一星期得兩班機，要自己安排需要一段時間，家由當地旅遊局安排，唔係為慳錢，只係想大家有個開心回憶。」問家人會否觀禮？思欣說：「都想父母同家姐見證，但時間太趕就唔到，有啲可惜。」採訪：丁寧
攝影：陳俊強