《壹週刊》預先替千二選委點票，計落唐贏梁幾條街，後者食晒塵冇得追。
撐唐鐵票，是以Baby寶寶為首的銀行家闊佬。《壹》想當然以為商家佬鍾意啖紅，冇可能靠攏穿膠花出身的CY。但商家佬真的能以紅酒品味特首選戰嗎？這不是當Baby寶寶儍，就是以為左右逢源比殺人鯨吞吐量更驚人的盛老闆是吳下阿蒙。而林老闆確實是唐唐摯友，但林是經營娛樂事業的，演技隨時勁過影帝星爺，萬一收到風要變陣，向梁營吶喊助威的尖聲，肯定比梁營誓師會那位女MC高多八度，響遍紅館。商家站台容易，翻枱也不害臊，聽命中央，配合佈陣，全是劇情需要。唐唐這邊，放出搏擊點數領先對方的自我感覺良好陳述，夢想能贏到最後。喔，有可能是無間道，暗中拉唐後腿，累他跣得比老董更傷。
同屬富二代，老董捨唐，撐充滿階級分歧的梁，可見上流社會，人心叵測。梁刻意跟上流階層保持距離，跟所謂的名人效應sayno，爭取沒票在手的市民的好印象。梁振英最後勝出的話，時移世易，曾經說過梁做特首便要跳海的香港人，係時候試下維港的凍水。很多議員抗議時已經跳過，沒大不了，死唔去的。