一直自覺不好運的鄧健泓（Patrick），最近終獲幸運女神眷顧，令他在無綫台慶當晚抽得總值一百萬元獎金獎品大獎，曾因一篤大便而失去好運，Patrick即時被方力申鬧醒，堅持到底，機會就是你，原來，女神一直沒有離開過，但他未想過要再下一城攞台慶頒獎禮的最佳男配角獎。撰文：羅美倫
無綫台慶當晚，鄧健泓中了大獎，贏得20萬簽賬額、1萬現金及70多萬獎品，他正將獎品分配給親友，以將快樂與親友分享。剛於去年買樓的Patrick說：「買樓用多咗錢，呢20萬可以畀自己揮霍吓，鬆一鬆冇咁大壓力，之前電話用到嘅都唔換。或者買啲金、手錶呢類保值嘅嘢。」
中大獎儲老婆本
Patrick女友龔嘉欣於12月5日台慶頒獎當日生日，Patrick已準備了禮物，但會加碼送多份女友，問是否女友旺他？Patrick說：「佢幾好呀，佢不停叫我要2號，2號係我幸運號碼，首歌《朋友二號》又hit，第二隻碟最賣得，風水師都話我係二仔。」問Patrick會否儲錢做老婆本？他說：「會，但人哋未必嫁！」
事實嘉欣確實幾旺Patrick，去年的《刑警》及今年的《隔離七日情》，Patrick的演出都令人眼前一亮，至於會否想借運勢攞台慶最佳男配角獎，Patrick說：「冇諗過，《七日情》年頭播，大家記憶唔新。我唱歌唔諗住攞錢，拍劇都冇諗住攞獎，當年攞樂壇生力軍時蘇永康話過，攞獎只係開心一、兩日，再過三、四日人哋就唔記得，最緊要繼續做好自己，不過適逢攞大獎，都希望將運氣帶落工作度。」
Patrick曾埋怨過他的幸運女神離開他置之不理，但原來女神一直沒離開，他明白因女神在身邊他才有健康兼中大獎，他說：「應該係唔順利，但家返嚟，以前有啲歌紅爆卡拉OK，但有啲嘢就係永遠捉唔緊溜走咗，希望可以留耐啲或者唔好走就好啦，唔可以再怨！」Patrick最記得38周年台慶那年，他獲抽中三萬八元大利是，但因他大便後走了而攞不到，Patrick說：「之後方力申鬧我『點解要走？一日留得低，機會就係你，你一離場就唔到你。』今次佢話唔走咪有囉。」
原來年中Patrick有諗過離開無綫，但最後留低，他明白到一定要堅持，且笑言：「咪等到城市電訊挖角，有堅持就攞得番自己嘅價值，哈哈……今年台慶開場前我就屙咗屎！」
演舞台劇尋真我
現在的Patrick已接受了人生起跌，笑言起起跌跌可以令他很high很過癮，也學會展望將來，除了唱歌拍劇外，他希望在舞台劇方面再做點成績：「自從陳志雲事件後，啲人一直用有色眼鏡睇我，其實陳生07年簽番我，只係令我生活上番軌道，無論我幾努力做人哋都唔多接受，對我唔公平。」幸好Patrick在舞台劇方面得到觀眾認同，令他有不少滿足感，他說：「只要你做得好，佢哋就畀掌聲，唔會理花邊新聞同是非。」
龔嘉欣盼生日飛躍
跟鄧健泓拍拖兩年的龔嘉欣，今年獲提名角逐無綫頒獎禮的飛躍進步女藝員，問嘉欣信心如何？她坦言：「會平常心看待，但都有信心，因為我都好努力，每個劇都做到最好。」問誰是最大對手？嘉欣說：「我睇好黃智雯，佢每個角色都令人有深印象，演戲又有經驗。不過頒獎禮當晚係我生日，我都想攞獎做生日禮物。」對於男友有份爭最佳男配角，嘉欣笑言會精神上支持。
與男友一凹一凸
至於Patrick中台慶大獎現正儲老婆本，嘉欣笑說：「未必係嫁佢㗎，仲要問屋企人，不過佢好有責任感，錫我又錫我嘅朋友，只係有時唔夠冷靜，工作上遇到負面嘢就唔開心。」才22歲的嘉欣雖未認定Patrick是結婚對象，但坦言二人性格一凹一凸很夾：「佢好深沉，成個藝術家咁。我就比較開朗，所以當佢遇到問題唔開心時，我雖然唔能夠為佢分析解決，但就可以嘻嘻哈哈番佢開心。」
男友積極工作，嘉欣也不讓自己停下來，她稍後會拍《大太監》，現正不時看其他古裝劇做參考，做好自己的功課。
髮型：[email protected]（鄧、龔）
化妝：SammyLam（龔嘉欣）
場地提供：IHair.Nails（鄧健泓）