情辭並茂的懺悔演詞，應該是這樣的：──
「就上星期喺橫店同小花小姐發生嘅不愉快事件，我喺度衷心講（透大氣）對唔住！（站起九十度鞠躬）我承認當日飲多咗，做出一啲過份無禮貌嘅舉動，（激動一點眼泛淚光）我知道今次令佢好難堪好難過，對唔住，（再鞠躬）──但係希望大家原諒我，尤其我過咗身嘅媽媽，（哽咽不停擰頭作哭狀）我記得小學嘅時候，每日一放學返屋企，就穿膠花幫補家用。我又每日孭住幾十磅膠花，陪紮腳嘅媽媽行路到山寨工廠。人窮志不短，自細我就對細細朵嘅膠花好有感情，好想攬住佢錫佢用我十隻手指擺弄佢，呢啲係我終生不能磨滅嘅情意結。我今日每一下動作，都有如我陪紮腳媽媽所走嘅路，（一臉痛苦用力擠眼淚）今次醉酒只係回憶起當年穿膠花情景，同埋對媽媽嘅懷念，想重返佢嘅懷抱，享用人奶嘅溫馨，（三鞠躬，啜泣，咳嗽）我同大家承諾，今後會努力戒酒，睇醫生，醫好我嘅戀母狂同埋戀花狂，對唔住請小花小妹妹接受我衷心道歉！（痛哭，發軟蹄，幾乎跪低）」
在場不少人大受感動，男的也有抹眼淚……