馮仁昭四圍超：亞洲先生
谷肌柯震東鬥Chok鋒 - 馮仁昭

亞視噚日喺總台公佈《2011亞洲先生競選》16位入圍名單，有中港台、泰、日、韓外，仲有烏茲別克、吉爾吉斯等冷門地區代表，年紀最大係35歲做演員嘅陳冠寧，最細係19歲嘅學生林睿。入圍者逐一喺台上自我介紹，可惜全部着恤衫牛仔褲毫無睇頭。

唔識林峯乜水

馮仁昭就覺得最靚仔係嚟自台灣13號做模特兒嘅25歲邱士峻，個樣似足近期hit爆嘅《那些年，我們一起追的女孩》嘅柯震東，佢話都有人話佢似柯震東，但自己覺得唔似，因為比唔上佢年輕，仲話柯演戲咁好，要跟佢好好學習。問佢搵到自己嘅沈佳宜未？佢話都已經過去，邱士峻又話知道好多參賽者好健碩，佢會努力練肌肉追得幾多得幾多。
貌似呂良偉嘅7號陳景國算係最大隻，胸肌有44吋，仲話震胸對佢嚟講係小意思，佢連大髀都識震。
全場最搶鏡都係16號來自泰國嘅林鋒，佢唔止個名同香港Chok神林峯同音，仲好識擺Chok樣，訪問嗰陣記者叫佢學林峯擺Chok樣，佢即刻Chok到唔識停，仲話自己最煞食係個笑容，不過佢唔係好知林峯係邊個喎。