黃智賢入行22年，得到的成就僅一般，最近憑《潛行狙擊》辣薑一角獲提名「萬千星輝頒獎典禮2011」最佳男配角，兼換來「人氣急升」四個字，一個角色不足以論成敗，但卻能令人眼前一亮，辣薑燃起了他心中的一團火，對拿下這個男配角獎充滿信心外，更深信終有一日演藝事業會攀上高峯。
藝人最愛說：「有提名已很滿足，得到獎是錦上添花。」之類的客套說話，黃智賢就擺明車馬說：「攞獎好重要，對觀眾同公司都係好大肯定，既然有提名點解唔想拎，參加咗遊戲點解唔玩，再有多啲都仲想要，我冇睇對手，但對自己好有信心，個角色畀到我好大感覺，遇到好角色，呢個機會好重要。」
一般都認定奸角比較突出，但黃智賢卻討厭用一個字去界定角色，黃智賢說：「每個人都係各為其主，根本冇忠奸之分，用一個主觀角度去睇一件事好冇趣，認識一個人唔會第一件事就問人你好人定壞人，所以我唔覺得辣薑係奸，角色夠人性至吸引。」
「唔知邊鋪爆」
演戲多年，雖然談不上得到很大成就，但黃智賢自言心中一團火從未熄滅，他說：「唔理戲份多少，每個角色都要用心去演，享受其中，就算得一集戲份，可能印象比做足廿集主角更深，我都做咗22年，係咪電視台一哥或者主角都好，總有辦法調適自己，唔係點去控制演戲情緒，就係因為我用咗22年時間去控制個人情感，我始終覺得只要一日唔離開呢個舞台，加上累積到咁多年經驗，信心、機會加埋努力，唔埋位唔知呢個係咪機會，往往唔知邊鋪爆可以上得更高。」
「藝員係隻棋」
黃智賢還自爆當初找他演辣薑講明是客串，他說：「當時叫我客串，個心都一沉，心諗唔係啩，我都做咗咁多年戲，仲要做串星，後尾同自己講唔好計呢條數，只係做，每個演員都係一隻棋，成盤棋有幾十隻，唔好咁快就整死我，隻棋都仲有得行，最後咪一路行到落去，仲畀大家記得呢個角色，呢樣就係僅有空間發揮無限。」採訪：魯萍
攝影：陳慧安
髮型：WillieChanofHairCorner
場地：HairCorner