家宅男女：LED玩乾電　通屋閃

十二月聖誕月。鬼佬朋友會揀今日開始聖誕家居佈置，HolidayMood湧晒出嚟。今日就幫大家搜羅慳電又安全嘅LED聖誕燈，今年新增更多外形標青嘅乾電款式，唔使拖隻「牛」（火牛），想通屋掛話咁易。

記者：朱崇德　
攝影：周旭文、伍慶泉、陳盛臣
Model：Waye@GMEModels

■原本純白聖誕樹，以36WLED射燈一照即刻要乜色有乜色。插頭好簡單，插一條線就開機。$980/a

上帝保佑！專燒聖誕樹嘅鎢絲聖誕燈已如恐龍般絕種，完全被LED燈串取代。據知「世界工廠」──大陸，今年亦主力出LED聖誕燈，大家都係100頭，LED只需7.5W，但鎢絲膽就要100W！燈飾師傅阿偉指，如果屋企仲Keep住舊燈，用嗰陣一定要用保險絲拖板，見插頭位發黑，即係曾經有漏電情況，就唔好再用。至於LED較省電、亮度高，長時間開亦唔會發熱，唔怕辣親多手細路。而且唔同搭配又有唔同玩法，唔止一串燈咁簡單。

今年鴨仔街新玩法！用盞36WLED射燈打落純白聖誕樹上，由於機身勁玩RGB三原色變化，成棵樹會從紅、藍、綠、粉紅、黃、青及白等七色中變化，真係型爆！最鬼馬係佢仲有漸變、跳住變或跟音樂節拍變幻效果，今年開Party一定要預埋佢。

屋企有小朋友，插濕電嘅聖誕燈都係有風險，玩乾電穩陣！30頭傳統造型，仲有不斷變色效果，最重要係三粒2A電就玩到12小時；如果用可叉式鋰電仲可玩耐啲。玩乾電仲有個好處，就係唔使遷就插座位又或者拉拖板，掛邊都得。

■個人覺得STRALA呢款燈串係最靚設計！雪花形仲要有暗波浪紋，好有立體感！行乾電的10頭版是室內專用，另有行濕電48頭戶外專用。（10頭室內用）$29.9、（48頭戶外用）$199.9/b

■波波款及透明仿水晶款聖誕燈市面上少見，行LED關係，可以做到單膽變色效果，三粒2A乾電驅動玩到24小時。15頭$78、30頭$158、60頭$238/a

乾電版LED暫時最高只做到60頭，燈串再長啲就要落火牛驅動。鴨仔街呢款108頭聖誕燈只會閃動不會變色，不過有聖誕音樂發聲，聖誕氣氛十足。

■STRALA雪球形串燈，由於散射面比較大，感覺顯眼好多，掛樹、掛窗、掛牆都有唔錯效果，幾百搭，仲係40頭設計，可戶外用。
$199.9/b

■（左上）24V108頭波波燈$268/a、24V108普通頭聖誕燈$238/a

想屋企個露台或玻璃窗好似商場咁玩燈海？原來價錢唔貴，一幅5呎×5呎或12呎闊×3呎高的LED大瀑布，分別只需$98及$88，仲有黑線及透明線版選擇。

■220V聖誕燈（5呎×5呎）$98、（12呎×3呎）$88/a

LED唔一定係一粒燈，仲有星形及樹形擺設。而每年聖誕，花墟「繽紛」一定好旺場，就連好多商場裝飾都喺呢度搵，平就一定，最重要係非周街係行貨，會特別啲囉！

■呢個半球體其實係個可旋轉擺設，將點點星光投射天花，營造浪漫氣氛。$149.9/b

■呢幾年唔止興玩聖誕樹裝燈，窗邊或層架都係主攻地，呢款白雪森林剪影可營造節日氣氛兼提供柔和室內燈光。$129.9/b

■（左）雪人燈$88、雪人家庭燈飾$398/c

■聖誕屋LED燈$98、聖誕公仔頭LED燈$55/c

嚟緊天氣會跌落十幾度，不過要佢落雪就幾唔現實。唔緊要！有偉大祖國仿真雪機，正如你睇ModelWaye在暴雪中砌聖誕樹一樣，佢可以在近千呎範圍內做出飄雪效果，所用原料是「雪油」，類似肥皂水配方，$150/5公升，玩足24小時都無問題。

■暴風雪由此而來！在高點發放更靚。SM-600噴雪機$780/a

年年新聞都話燒聖誕樹，搞到大家掛燈時心掛掛？問宜家家居室內設計師阿Ben：「我哋返咗啲真嘅聖誕樹，比一般塑料假樹安全；最重要係如果屋企有地方，可以種落嚟，出年再用夠環保！」至於裝飾聖誕樹，Ben留意到好多人只流於表面：「好多人忽略將掛飾放喺樹嘅中間，其實細件嘅放外面，大件嘅放中間，整棵樹先至美麗均稱！」

a.新世紀（27087138）　
b.宜家家居（31250888）　
c.繽紛（27872203）

家宅男女：LED玩乾電 通屋閃

家宅男女：LED玩乾電　通屋閃