年輕一輩歌迷未必知劉鳳屏是誰，但老一輩的一定聽過她的歌，唱過無數經典國粵語名曲的劉鳳屏，婚後已移居加拿大多年，最近回港準備明年初的演唱會，熱愛音樂的她，仍對音樂不離不棄，在加國收徒弟教唱歌，鍾嘉欣、諸葛紫岐都是其學生。」
曾唱過不少經典名曲的劉鳳屏繼07年後，將於明年1月10及11日於文化中心舉行「劉鳳屏金曲再回頭望一望2012」演唱會，她日前由加拿大回港籌備演唱會。
開騷揀歌最頭痛
劉鳳屏說今次最大壓力是選曲，她唱過無數歌曲，希望盡量滿足歌迷：「唱咗咁多年，乜歌都唱就最好，但最多唱到廿幾首，所以揀歌好頭痛，家仲未揀晒，首本名曲外、民歌《橄欖樹》、《康定情歌》都會唱。」
婚後移居加國的劉鳳屏，有段日子曾將最愛的咪高峯放下，但對音樂始終有不解之緣，她說：「初初結婚嗰10年，真係放低咗支咪，但唱歌有癮，所以間中返港開演唱會之外，喺加拿大都有教唱歌，鍾嘉欣、諸葛紫岐都係我學生，我啱啱有個學生喺溫哥華歌唱比賽攞冠軍。我爸爸以前都係教唱歌，我走番佢條路。」
有睇《超級巨聲》
劉鳳屏續說：「學生唱得好比我自己唱得好更重要，好似鍾嘉欣，初時嚟學，把聲細到蚊滋咁，開聲都未識，家進步好多，佢返加拿大有機會都叫我補堂。」
劉鳳屏仍緊貼現今樂壇，亦有看無綫剛播出的《超級巨聲3》，對於某些唱得不好的歌手，她說：「家流行曲寫得啲音太闊，太多假音好易出錯，唔似我哋以前啲歌咁平實，如果識得用假音就好好聽。」
採訪、攝影：魯萍
場地提供：凱悅酒店