陳敏之當年挾日本樂壇教父小室哲哉徒弟之名在電視圈起步，未見優勢，反而十年後靠「索腿天后」帶挈不少。敏之是今年無綫台慶頒獎禮最佳女配角獎大熱門，昔日的黃毛丫頭如今坦言各方面都準備好，攞獎攞老人牌同慶賀入行十周年。
今年無綫《萬千星輝頒獎典禮》各獎項競爭激烈，其中最佳女配角以陳敏之為大熱門，向來謙虛的她直言：「我好想攞，因為入行已經十年，今年攞老人牌（十年服務金牌），如果攞埋獎好有意義，我擺咗十年青春喺度，又得到公司栽培，由黃毛丫頭變熟女，除咗名利外，學到好多，亦成熟好多，我各方面都準備好攞獎喇。」
「平常心輸唔會喊」
敏之多年努力，終遇上好劇本、好角色，她為劇集《怒火街頭》的索腿天后角色付出好多，更曾跌倒受傷停工：「我都冇諗過，索腿天后係一樓一，從未做過咁另類嘅角色，係大挑戰，唔使做乖女、有錢女角色，突破框框，十年喇，都係時候進入另一階段。」
不過敏之的對手也強，能夠成為大熱，她覺得能得到外間人認同已當贏了，而她也有自己的心水：「我好欣賞江美儀，亦睇好胡定欣、陳茵媺，雖然要面對好多長輩老戲骨如黃淑儀、馬海倫等，但比賽就要對自己有信心，咁我都會係平常心，輸都唔會喊，下次再嚟過囉。」
下個目標爭視后
下一個目標攞視后？敏之笑言：「呢個係長線目標，家先有女配角提名，亦因為咁而做咗《東西宮略》女主角，我會朝呢個目標，向我事業另一階段進發。」
採訪：汪芷寧
攝影：仇志德
場地：CoyoteBarandGrill
服裝：ClubMonaco
