求驗客手記:英倫球隊齊輸波 - 求驗客

求驗客手記:英倫球隊齊輸波 - 求驗客

曼聯喺英聯盃8強主場爆大冷輸咗畀水晶宮出局,其他同晚出場嘅英國球隊都好羞家;另一英超勁旅熱刺,喺歐霸盃A組關鍵戰同樣陰溝裏翻船,成個下半場踢多一個人,但主場竟以1:2不敵希臘嘅PAOK;熱刺箭頭迪科爾曾經喺75分鐘近距離破門,不過球證就話佢犯規在先判入球無效(左圖)。最後一輪熱刺一定要贏波,兼望魯賓卡山大敗畀PAOK先有機會出線,真係前路難行。
另外,有施積(右圖)射失12碼嘅伯明翰,喺歐霸盃H組作客一球不敵葡超嘅布拉加,命運操縱喺布魯日同布拉加手裏;而英倫三島傳統勁旅之一些路迪,喺I組主場亦以0:1不敵西甲嘅馬德里體育會,下場一定要作客贏烏甸尼斯先可以出線。