唐英年在十一月二十六日宣佈參選，梁振英在十一月二十七日發表競選宣言及舉行造勢大會，今日又到唐營造勢。兩位疑似特首候選人正式拋開面紗，換上擂台裝束，戴上拳套，即將開打，由今日計起，砌足一百一十六日，係拳王爭霸戰之長途賽，會唔會有當年傅利沙大戰阿里咁刺激精彩，拳拳到肉，直至最後一秒，尚難分勝負呢？
首先開拳嘅係人稱聰明深不可測嘅老虎。有一位留學美國女士對左丁山講：「Hehitsbelowthebelt」真難繙譯，打西洋拳，只准打上半身，腰帶（belt）以下唔准碰，打親算違規，但老虎仔對住記者講蠢人不應治港，特首須是能幹之士，個人能力最重要。老虎仔做事夠勤力，從無到有，從港督府守門口警察之子爬升到特首候選人，明年三月二十五日贏咗嘅話，唔知會唔會在禮賓府門口，做一次「家祭毋忘告乃翁」嘅國民德育教育動人場面呢？有咁嘅本事，自然天生聰明、有拼勁、競爭力強，如米高佐敦、高比拜恩呢類NBA大明星掛在口邊嘅口頭禪：「Iplaytowin！」，做起事來，如狼似虎，遇佛殺佛，見神殺神，並非「無得hea吓hea吓，就繼承咗爸爸盤生意」（蘋果十一月廿七日A1版）。
指人蠢唔好做特首，係有的放矢，故此上述女士聽咗之後，衝口而出hehitsbelowthebelt，騎騎，政治競爭係咁㗎嘞，美國咪又一樣，不過美國啲總統候選人用辭力求政治正確，話人地蠢，一定會俾傳媒鬧爆，唔似得香港咁樣自鳴得意。通常真正聰明的人唔會話他人係蠢材嘅，周星馳就講得幽默，記者問佢識唔識得老虎仔，周星馳話：「我唔識」，後來又話佢唔覺得龍人蠢，因為「我唔同蠢人做朋友」，語帶雙關，連消帶打，識講嘢就係識講嘢！老虎仔生於一九五四年，歲次甲午，生肖屬馬，但個面相就幾似老虎唔似馬，反為被人戲稱為豬嗰位嘅面相夠長，更加似馬，佢生於一九五二年，歲次壬辰，屬龍，係水龍㖭，而龍嘅面亦係好長嘅，一啲都唔似豬，不過扮吓豬亦無妨，廣東俗語有云：扮豬食老虎，如食老虎都得，食狼更加無黐牙！