近幾個月來，凡係碰到賓架，講到負債管理，佢地都有啲皺眉頭，皆因港元存款增長緩慢，九月份數字甚至有啲降低，七萬三千億元存款之中只有三萬五千幾億係港元，六千六百億係人民幣，餘下三萬一千餘億係外匯存款，因香港人鍾意高息貨幣，但近月澳元、歐羅、新西蘭元皆大跌，不少散戶相信在股市失意之餘，在匯市亦有損失，加埋樓市呆滯，大圍新盤開出售價仲平過二手樓，於是個人投資慎防受損之餘，銀行方面更要慎防信貸爆煲。唔係講笑㗎，歐美債務危機揮之不去，內地港商出口訂單大減，國泰航空與機管局發布嘅空運貨量數字，已連續下跌幾個月咯噃，銀行借錢俾廠商，唔要睇到實一實呀？
十一月三日報紙報導金管局出招嚴防歐洲資本銀行「班資回朝」，及銀行界收緊各類貸款，就算係大地產發展商嘅銀團貸款再融資，都未必夠額，並且利息要上調，外資大行如里昂及巴克萊預測發展商可能因借錢條件不如理想，改為「股本融資」，講白啲，就係發新股抽水啦。
因此諗起，新世界早着先鞭，宣告供股集資逾百億元，曾受一間外資大行分析員批評為不負責任，理由係跌市中不應集資抽水。究其實，公司上市主要目的有幾項，其中以利用資本市場集資壯大公司實力，鞏固資本一項最為重要。歐美好多大家族企業上市，其實係為咗在公開市場爭取更大資本，以免被淘汰，私人家族有幾多錢都好，最後都難與市場匹敵。新世界供股集資並無不是之處，反而幾個星期來之金融市場突變，證明借錢艱難，及早供股集資是為上策。理論上，利息低嘅時代，向銀行借錢更能降低「加權平均資本成本」（WeightedAverageCostofCapital），符合股東利益，但是借到咩？借款條件好寬鬆咩？得個講字。中國人老闆最喜歡有近身錢，不喜歡聽銀行指點，呢種方便比WACC更能打動老闆之心，新世界提早集資，已證明是對的，其他大企業依家想話聽投資大行話去供股集資，未免遲咗啲咯，起碼已蝕咗千幾二千點。