要數近期大紅人，非彤叔鄭裕彤莫屬，向來生活逍遙嘅彤叔，近日為周大福珠寶（1929）上市，吓吓都要親身出嚟推介，可能「大弟」都鋤少咗。不過吊頸都要唞吓氣，噚日下晝，華華喺中環周大福門外見到彤叔，佢身邊唔係banker，而係一位清純靚女。
據彤叔身邊線人講，一向都有位大概30幾歲嘅看護陪伴彤叔左右，質疑華華今次係咪諗多咗。
據現場所見，純情靚女依偎喺彤叔身邊雞啄唔斷，係咪看護就等大家判斷。不過，呢位靚女相當眉精眼企，發現攝記舉機影相，即時彈開，換咗位年長女士同彤叔再傾過，但好明顯，彤叔同年長女士保持一段距離。
街頭依偎再彈開
喺彤叔嘅紅顏知己中，令人印象較深嘅要數哈爾濱姑娘顧美蓮（Cindy），對比番Cindy嘅舊照，噚日位靚女有幾分Cindy影子，最大分別係size由「S」升到「M」碼，腹部微隆。
話時話，出年係龍年，近日Kelly、華仔紛紛報喜有咗龍B，講到「腹部微隆」，難免令人誤會。不過，點都好，下星期周大福開始招股，勢成今年「集資王」，加上全城熱捧，點都係喜事一樁，華華一於率先恭喜彤叔！
李華華
mailto:[email protected]