上個禮拜六收工，約埋新舊戰友視而不見、畢傑同力奇大戰四方城，出嚟聚舊吹水兼睇波，都幾盞，一開局睇邊場？睇阿仙奴對富咸。
話說在場嘅力奇，同小弟一樣係阿仙奴粉，不過論狂熱程度，佢一定勁過我，當兵工廠輸緊波嘅時候，佢就肉緊非常，到臨完場華美倫追番，就起勢搏命嗌快啲反勝，我會叫呢種粉做狂派球迷。
點為之狂派？我唔識《變形金剛》，不過原來身邊真係有好多呢類球迷，有啲會因為自己力撐嘅球隊輸波而黑面、有啲又會爆晒粗、逐分鐘咁講番成場波，但又唔會點講自己隊波有咩問題，係接近有啲失咗理智嗰批，而舊戰友力奇，就會喺講波嘅時候，用我哋去開頭，即係咁：「我哋今年仲有機會！」、「我哋今場可以反勝！」聽到唔係兵工廠球迷嘅畢傑反晒胃，我係兵工廠粉，都有啲打冷震，因為真係講唔出口，盲目。
除咗狂派，點少得博派！呢個博，係賭博個博，畢傑就係呢類球迷，佢係祖雲達斯粉，不過做得博派，當然係贏錢至上，佢同我講過：「唔通明知祖記呢場輸都買落去咩！」支持係一件事，落注又係另一回事，理智與感情，分得好清楚，亦都唔存在情感對冲，「S兩楝」最重要。
支持一隊球隊、向一隊球隊落注，我從來都覺得係好主觀嘅事，你哋又係邊一派？
守丹
周一．列紅塵
周二．仙道彬
周三．守丹
周四．視而不見
周五．丘建威