男人犯了錯，立刻承認錯誤，然後以行動去證明自己改過，其實這個行為都可以幾型，事關男人最型就係去處理、解決問題的時候！但有些男人不但不型，其處理手法簡直係窩囊都不如，影衰晒男人！錯就要認，衰就唔該企定！係唔肯認定蠢到以為「飲醉大晒」呢？第一時間回應「嗰晚飲得好醉！無晒意志及理智！」咪可以用「酒精害人」來減輕自己罪名，點解蠢到仲要話「我份人太好客……」咁何不答得再坦白，「我認為同其他女仔打吓車輪係絕對無問題，你哋思想落伍，至會咁大反應！」人家無你咁前衞，唔知現在「用車輪招呼客人」乃「好客之道」！幾日後，仲要帶埋個大肚老婆出來，哭得死去活來作公眾道歉，玩就自己玩，有鑊就預埋老婆一齊孭，順便仲可以胎教埋，真係合乎經濟效益！同場另一個男人就仲「型」，第二日立刻上演一場「朋友的最大用途，就是要來出賣！」佢賣友求榮不止，仲回應「我好後悔當時無阻止，疑似的親密行為，其實是在安慰她！」原來佢連越描越黑都不懂，人家說男人是用下體思想，真是不無道理，但點「型」都不及拍攝嗰一位，如果第一時間拯救，就拍不到這兩位型男的罪證，現在就無法讓全球一起聲討二男，所以我有理由相信，個女仔一直唔走，亦都係忍辱負重，放長線釣大魚。
而全件事最「型」是出言唾罵二男的肥導演，因為他最有資格，多年來形象帶點鹹濕，緋聞不絕，但各位可曾見過他樣衰、猴擒、狼胎搞女仔的一面？
男人，出去玩無錢無面無所謂，最緊要有……腦。
作者Profile
編劇、導演兼電台節目主持，認為「愛情」是沒有工作時的玩意，「工作」是沒有愛情時的必需。
作者：鄒凱光
逢星期三刊出