朗拿度踢波時榮譽多多，3屆世界足球先生、世界盃同西甲神射手等拎到手軟；勢估唔到「肥哨」今年退出球壇後，都多咗個「新朵」，就係2014年巴西世盃組委會主席，大家以後要叫佢做朗主席！
做巴西世盃組委會主席
其實過去嘅世界盃組委會，都會搵啲極夠份量嘅人做主席，好似98法國世盃，主席就係法國球王柏天尼，06德國世盃就由「凱撒大帝」碧根鮑華做主席。比較呢兩位前輩，35歲嘅朗拿度雖然年輕咗啲，但踢過巴塞、國米同皇馬等頂級球會兼獲獎無數，又幫巴西贏過兩屆世盃，絕對夠晒班。
朗拿度嘅前國家隊隊友卡富就話：「我肯定朗拿度可以勝任呢個工作，好多運動員退休後從事相同領域都獲得成功，佢有好多好主意，亦識得管理。」但世盃組委會主席要做啲乜，鍾意玩嘅朗拿度究竟知唔知呢？今年先喺哥連泰斯收山嘅朗拿度，越嚟越肥，職位越高；但我求大俠就擔心，肥哨呢次俾人擺上枱，隨時搞到英名盡喪。事關據《巴西環球體育》報道，肥哨係受到現任巴西足總主席列卡度特謝拉邀請去坐呢個位。
呢位仁兄喺2018同2022年世盃投票選主辦國，之後被英國傳媒踢爆公然向有份申辦嘅英格蘭索取利益。列卡度特謝拉之前又因為公開支持同白禮達爭國際足協會長嘅哈曼，得罪白禮達，亦因為哈曼涉及賄賂而搞到自己一身蟻；而且佢亦涉嫌非法收受合作廠商900萬美元，被巴西司法機構調查，正一其身不正呀！
基建大落後隨時要孭鑊
講番巴西世盃嘅球場建設進度，一直遠遠落後指標，最近里約熱內盧嘅馬拉簡拿球場重修工程，又發生工人罷工，連球王比利都公開話擔心趕唔切開波！肥哨懵盛盛上場，好聽啲就做吉祥物主席，但話事嘅咪又係巴西足總班人；如果一下唔覺意出事，孭鑊就係朗拿度自己喇！