型男索女，去到邊都咁受歡迎，就好似皇家馬德里嘅葡萄牙前鋒基斯坦奴朗拿度（C朗）同佢女友艾琳娜，日前橫越大西洋咁威威，男嘅型仔裝束留喺西班牙攞《阿斯報》頒畀佢嘅年度最佳運動員，女嘅就以性感打扮出席喺墨西哥嘅花生騷。
獲頒最佳運動員
C朗喺上季雖然幫唔到皇馬贏西甲同埋歐聯，但總算幫隊波執咗西班牙盃，而且自己亦打得超好，成季入咗53球；今季呢位26歲攻擊球員繼續有出眾表現，上陣19場入20球，帶領球隊喺歐聯分組賽以5戰全勝入16強，以及喺西甲6分領先死對頭巴塞隆拿。勁成咁，佢亦俾西班牙報章《阿斯報》嘅讀者，選為2011年最佳運動員。而佢雖則冇以全副老西出席頒獎典禮，不過恤衫牛仔褲配西裝褸嘅smartcasual造型，加埋個chok樣，足以令佢殺晒全場，成為記者朋友爭相拍攝嘅對象。
C朗喺領獎後表示：「呢個獎項對我嚟講，係個難得嘅榮譽，今次係我第2次贏到呢一個獎，我要將獎盃同隊友一齊分享，我好多謝佢哋。我所攞到嘅一切個人成就，有賴隊友同埋皇馬球迷嘅幫助，我真係好開心。我屋企仲有大把位去放獎盃，呢種榮譽會激起我嘅鬥志，令我更加努力。我仲有好長嘅職業生涯，我會幫皇馬贏取更多獎盃。」
C朗揚威西班牙，佢女友艾琳娜都唔輸蝕。呢個25歲嘅俄羅斯模特兒日前去墨西哥行貓步，大騷佢對長腿。佢仲好識做咁話：「我係第一次嚟墨西哥。墨西哥真係好靚，係度假、玩樂同埋工作嘅好地方。」平時C朗同艾琳娜拍拖行街食飯或者一齊出席公開活動嘅時候，經已係傳媒焦點所在，估唔到呢次分道揚鑣，一個喺東，一個喺西，一樣咁搶鏡。靚仔球星加靚女超模，果然係唔同啲！