馮仁昭四圍超：海角茂伯猝逝
魏德聖、田中　淚盡相送 - 馮仁昭

喺台灣賣座片《海角七號》飾演「茂伯」嘅林宗仁，前日下午突然因心肌梗塞喺家中嘅浴室暈倒，送院救治後證實不治，終年64歲。
噚日茂伯嘅家人為佢喺板橋潮和社設靈，由於家人唔想將佢遺體冰凍，加上茂伯有知名度，所以家人開會後先預計1個月後舉辦告別式，過年前完成儀式。噚日茂伯嘅至親去咗靈堂見佢最後一面，家人原本怕茂伯90歲嘅母親接受唔到呢個噩耗，所以延至噚日朝早先通知佢母親，林媽媽係中午到達靈堂時表現堅強，但據悉佢摸到兒子嘅遺體時情緒激動。

田中千繪哭腫眼

而捧紅茂伯嘅台灣導演魏德聖，同埋曾主演《海》片嘅田中千繪、馬如龍等先後到靈堂祭拜。魏德聖原本打算出國旅遊，但出發前收到噩耗，佢噚日一臉嚴肅到達靈堂，心情低落得無法說話。田中千繪亦哭到雙眼紅腫，並與茂嬸相擁安慰。
馬如龍上香時忍不住淚流滿面話：「6月16日跟他見最後一面，真的是電影界的損失。」而新北市長朱立倫亦有去靈堂上香。