50美日明星賽　喪駁168Hit

50美日明星賽　喪駁168Hit

一向覺得格鬥Game最講鬥智鬥力捉心理，但一遇到《MVC》系列，大堆頭人物個個出招都花多眼亂，閒閒哋幾十Hit，加埋三人一小隊換人策略，真係打到手忙腳亂。最新Ultimate版，角色更激增至50人，格食格更複雜深奧，絕對考你出招嘅章法。

記者：徐影龍

新人新衫眼都花

距離《MarvelVsCapcom3》不足半年，廠方已推出Ultimate加強版，將本來已集合38位美日英雄嘅格鬥Game，增加至足足50人！莫講話深層研究攻守技巧，單單記熟呢班人水蛇春咁長嘅出招表，已經難過我考的士牌記街名。《MVC》系列最好玩之處，係有大量跨遊戲角色加入，好似《逆轉裁判》成步堂、《魔界村》阿當、《生化危機》Chris等，將你我熟悉人物，統統變成格鬥高手，而加強版更新增《惡魔獵人》旦丁大佬Vergil、《出擊飛龍》Strider等共12名新角色。我玩咗幾日，最鍾愛新人係《幽靈戰警》GhostRider，一條長長火鞭勁到無倫，幾招必殺技喊出電影內經典對白「Youareguilty！」「Haveanicedead！」加上踩住架哈利電單車出超必，實在型到不行，必操！
新角色外，近日更有新服裝DLC登場，好似美國旗版IronMan、仿電影版美國隊長等新Look，加上舊有嘅變形俠醫、蜘蛛俠等正義聯盟，簡直就係電影《復仇者》嘅預演版。

■IronMan將成支美國旗着上身，老實講，有點醜。

■美國隊長近似電影版，但盾牌形狀有所改變。

■幽靈戰警一使出贖罪之眼，突然諗起尼古拉斯基治個搞笑造型。

■地獄業火分上中下三路進攻，判定範圍不俗，絕對係主力招式。

■呢個正義組合，不期然諗起下年五月上畫嘅電影大作《復仇者》。

■新角色Strider，有忍者以快打快嘅特色，仲有機械猛獸幫拖。

高低手各有各玩

打咗《街霸》廿幾年，學曉咩叫立回睇位捉心理，但嚟到同樣係Capcom開發嘅《MVC》系列，就完全唔Work。為迎合一眾Marvel超人，搞到日系角色出招變得又誇又勁，空中波動拳、超遠昇龍拳，勁到好似開咗葵花寶典咁，瞇埋眼隨便亂Chok，都駁到幾十Hit連技。最大問題係人多招多，加上輔助角色可幫手連招，搞到ComboHit數多到好似做Show咁，隻Game出咗無耐，YouTube已經有高手，以Vergil示範168Hit連技，超必又華麗又誇張，低手如我又確係宣洩到不小壓力指數。以為係細路仔格鬥Game？世界各地每年都有唔少大型格鬥賽，《街霸》、《拳皇》以外，《MVC》亦係高手競技場之一，梅原、Justin等世界級高手都有參加。即係等於雞糊又碰又上好易食啫，但高手坐埋一枱，就知竹館牌有幾考牌章喇。

■《少年街霸》造型嘅春麗，緊身運動裝別具韻味。

■最終Boss銀河王，霸咗2/3個畫面，相當屈機。

■成步堂名技「Objection!」，當正戰場係法庭。

■追迹者居然同Chris一夥，呢個組合又幾得意喎。

■要駁上過百Hit，必先搞懂超必槽點先可以「邊用邊賺」。

168Hit示範：

http://www.youtube.com/watch?v=QrU3L16MkL4

　
《UltimateMarvelVsCapcom3》

主機：PS3/XB360
類型：格鬥
售價：約$248
服裝包DLC（每Pack計）
PSN：$31-$39　
Live：320-400MSPoint

■兩主機版本，均有雙封面設計。