【抽水門之囂張累事】19歲宅男女神陳嘉桓（Rose）日前報警稱在內地遭非禮，陳浩民涉嫌狼吻兼上下其手，雖然陳浩民日前已拖大肚妻蔣麗莎公開謝罪，但未獲陳嘉桓和其師傅冼國林接納。冼國林昨日接受本報獨家訪問，狂轟陳浩民道歉欠誠意，加上他的經理人林查理的囂張言論，令事件越搞越糟，冼國林不忿說：「焗我撐大佢！」
陳浩民和馬德鐘日前在橫店約陳嘉桓夜蒲，卻被發現涉嫌抽水，當中陳嘉桓全程儍笑，外間也質疑她沒反抗意識，事後陳嘉桓速速返港開記者會交代事件，還高調報警求助。陳浩民為平息風波立即拖明日產女的大肚老婆蔣麗莎謝罪，聲淚俱下道歉。馬德鐘則連日風騷否認抽水，日前更獲無綫高層樂易玲和陳嘉桓師傅兼經理人冼國林力撐還清白。
嘉桓以笑遮醜
矛頭現集中在陳浩民身上，據知冼國林不滿陳浩民道歉欠誠意，也不滿其近日言論，故會追究到底。冼國林昨日在觀塘接受本報獨家訪問，力斥陳浩民和經理人林查理處事不當。
冼國林直認抽水事件當晚是陳嘉桓第三晚跟兩男夜蒲，他說：「Rose出去玩係得到我同意，三晚去玩係曾經飲過酒，但發生事嗰晚佢係飲可樂。我唔准Rose喺18歲前飲酒，但18歲後我鼓勵佢飲少少，佢大個女係要學識飲酒。我唔認同一個女仔飲咗酒就可以俾人亂摸，作為有風度嘅男士，係咪應該照顧飲醉嘅女仔，況且Rose當晚冇飲酒。」
對於陳嘉桓被拍到遭抽水仍笑不停，冼國林解畫說：「Rose好單純，冇機心，成日都戇居居，佢唔好意思怕尷尬就以笑遮醜。佢入行呢兩年，公司對佢太保護，令佢冇危機意識，佢當時怕得罪前輩唔敢反面。」
不應拖累老婆
對於陳浩民拖大肚妻哭訴到發軟蹄，冼國林說：「我太太都啱啱生咗囡囡，陳浩民做錯嘢要自己承擔，大肚婆就臨盆好多心理壓力，唔應該要老婆一齊出嚟，男人大丈夫，做錯要認，唔應該顛倒是非黑白。」
就陳浩民公開謝罪時以醉酒為藉口，冼國林說：「佢戒唔戒酒唔關我事，佢唔應該屈Rose。」他覺得陳浩民的謝罪欠誠意，同時其經理人林查理會後又表示陳浩民向來威慣，甚少認低威，言下之意喪喊謝罪已交足貨，正好辣㷫冼國林，他扯火說：「佢經理人真係幫倒忙，陳浩民應炒咗佢，焗我撐大佢！佢經理人又話浩民內地人緣好，唔怕公安，我好相信中國法律，唔信有人可以隻手遮天。」冼國林寸林查理在謝罪記招未有給陳浩民執走貓紙，令他講稿有躬鞠提示被揭而出洋相。
曾志偉代求情
冼國林否認要「隊死」陳浩民，到底要做甚麼才可令他息怒，冼國林說：「馬德鐘最後都捐款，佢將壞事變好事，相對馬德鐘係值得包容，我得饒人處且饒人。我只希望為Rose母女討返個公道，我唔會提出條件，佢自己要提出方案，最少令Rose母女接受。」可會給陳浩民訂下死線時間？他說：「我一切照計劃去做，同律師商量先去內地報公安，香港就會作民事訴訟，我請咗大律師諮詢意見。」冼國林承認曾志偉有致電代向陳浩民求情，反而當事人沒主動聯絡。
採訪：比華利
攝影：陳慧安