國家富強，機會處處，財經事務及庫務局前局長馬時亨都話，如果後生番廿年，都會北上打拼。
話說馬時亨噚日為恒生銀行舉辦嘅青年領袖教室做嘉賓，講到「積極面對挑戰開拓國家新未來」呢個課題時，有感而發話，如果可以返到20年前，佢都想返上海、北京發展。
返大陸打工變老闆
至於當年唔返嘅原因，咪係有家庭牽掛，以至未能如願囉！所以佢鼓勵台下嘅學生返大陸做嘢。佢仲話識得個劍橋畢業生，幾年前返大陸打工，由2500蚊人仔薪金做起，家陣已經做咗小老闆。
近排個個名人都話自己嚟自草根階層，馬時亨講到自己細個時，都話當年好窮，「窮人都唔使擔心，貧富懸殊係向下沉嘅漩渦，向上流嘅動力。」佢勉勵年輕人面對貧窮，要保持積極心態，加上教育，可改變逆境。係呀，隨時特首都有得你做，星期日振英哥都係咁講嘅！