廖碧兒曾公開數臭陳豪（阿Mo）多年來不給予女友名份，但「新豪嫂」陳茵媺卻獲厚待，阿Mo昨日出席聖誕活動時，不避嫌大談茵媺，還冧爆透露女友無論戲內戲外都一樣鍾意他，並事先張揚聖誕會帶茵媺食聖誕大餐，認真同人唔同命。
陳豪昨日在大埔出席聖誕亮燈活動，即場獻唱英文歌，又教粉絲跳舞，雖然表現略有失準，但台下街坊依然看得好開心。
畫女神模樣
阿Mo還在台上畫了一幅畫，透露是心目中女神模樣，未知是否依照女友陳茵媺作藍本。問今年聖誕怎樣過？阿Mo事先張揚會同女友撐枱腳：「第一年一齊過聖誕，會盡量sweet啲，希望可以花多啲心思做準備。因為我哋都忙，唔會出埠，希望可以出街食聖誕大餐。」會否獻唱情歌？阿Mo笑說：「唔會，我係二打六歌手。」
阿Mo續說，茵媺都有捧場睇《天與地》，但覺得他在戲中的角色有點壞，問女友鍾意哪個他？阿Mo一副冧樣說：「佢鍾意我戲裏面嘅角色，但又鍾意現實我呢個人。」他直言最初擔心觀眾未能接受大隻佬造型，幸反應不俗，問現在還有否繼續操fit？他尷尬說：「家平滑咗少少。」
老翻代宣傳
另外，林保怡、黃德斌、湯盈盈及朱慧敏等前晚在將軍澳出席《天與地》宣傳活動，阿Mo雖然缺席，但有人戴上他的面具頂替他。問保怡稍後會否再做宣傳？他說：「盡量抽時間，因為呢部劇好難得，係一部好有電影感嘅電視劇，雖然有人話有啲唔係好明，但更加想追睇。」
有指《天》劇食人一幕，令人覺得嘔心及殘忍，保怡和德斌認為故事可帶出不同訊息，令人有更深反思，保怡說：「唔好咁膚淺只睇表面，再睇落去會帶畀大家好多思考。」
採訪、攝影：卓寶花、胡比