網民對特首跑馬仔意見一籮籮，有團體呢幾日喺討論區、社交網站做咗個調查，發現宣佈咗參選嘅唐英年同梁振英支持度叮噹馬頭，唐唐喺網上民望竟然高出振英哥兩個巴仙。但如果有其他選擇，網民會選劉德華（32%）做特首，其次係陶傑（28%），第三係首富李嘉誠（23%），chok晒嘅林峯都有1%。屬於「其他」類別嘅余若薇、李柱銘、汪明荃夾埋只有5%。如果有真普選，唐、梁你算老幾？
周星馳挺唐或有幫助
準備參加特首選委會小圈子選舉嘅IT界別選委候選人Sony香港高層項明生、高登CEO林祖舜等人，組成咗「網民力量」，日前喺網上訪問5,743人，近八成都係80、90後年輕人。佢哋發現網上有41%「民意」支持唐唐、39%支持振英哥，葉劉淑儀支持度都有19%，但支持何俊仁嘅只有0.5%。網民認為做特首形象唔係最重要，個人能力同有乜政綱先係重點。
坊間唔少民調都話，振英哥民望拋離唐唐，但呢個網民調查就有唔同結果。項明生話，前日好受網民歡迎嘅周星馳妙語挺唐唐，可能對唐唐支持度有幫助。林祖舜就分析，支持唐唐嘅網民就可能因為唐唐講嘢次次笑料百出，佢引咗一啲網民精警留言，例如「佢成日條條fing，又多紅酒又多課外活動，我偶像呀」、「佢提供好多笑料同歡樂畀市民，唔似隔籬個衰人奸奸哋」，有人仲話「佢唔登基我點搞革命」。
不過呢，如果聽日有真普選，就唔輪到振英哥做特首啦。調查發現，若然有得畀網民提名嘅話，劉德華係特首大熱，才子陶傑都有好多支持者，仔教授沈旭輝都唔錯，支持度有5%，同長毛梁國雄一樣。林祖舜強調，呢個網民民調只係參考，一旦做到選委，唔一定就投唐唐，最緊要睇邊個候選人可以提出對IT界有利嘅政綱，而支唔支持網上二次創作「惡搞」都係考慮因素之一。
