曼聯前晚喺主場對紐卡素，去到換邊後4分鐘後先開紀錄；不過球波都入得好奇，係紐記中堅史提芬泰萊門前解圍，省中「小豆」查維亞靴南迪斯反彈入網。而喺15分鐘之後，有另一件奇事發生。
話說紅魔中堅里奧費迪南禁區內打橫鏟向紐記中場賓艾化，球證米克鍾斯見里奧掂到波先，於是判角球；點知佢同旁證約翰菲恩傾完一輪之後，就改判12碼！曼聯班球員梗係唔滿意啦，但冇計，只好無奈接受。操刀嘅丹巴巴亞冷靜射入，為紐記扳平。
完場前「小豆」近門射入，可惜被判越位在先，入球無效；結果曼聯因為球證「彈弓手」，由3分慘變1分，家佢哋繼續排第2位，但就未能拉近同「1哥」曼城嘅距離。
費Sir怒插兼職旁證
講番里奧輸嗰球12碼，球證嘅判決真係好有爭議；曼聯「疑似」寃枉失分，領隊費格遜賽後梗係狂插「元兇」約翰菲恩。佢話：「簡直係笑話！問題源於裁判嘅水準，雖則球證係全職，弊在旁證係兼職呢！除咗個旁證，我唔相信有人會覺得嗰吓係12碼！」連紐記領隊柏度亦撐費Sir：「里奧嗰吓真係幾冒險，但佢真係掂到個波先，我睇得好清楚。」
費Sir又補充：「之前對新特蘭，旁證舉旗示意我哋球員喺禁區內犯手球，但好明顯係對手隻手；不過個球證好清醒，推翻個旁證嘅決定。」費Sir咁講，罷明寸米克鍾斯夢遊球場啦！話時話，英國傳媒爆料指，曼聯對紐記場波嘅執法球證本來係杜特，但佢賽前病咗，先改由米克鍾斯嚟吹，都算曼聯唔好彩囉。
