初為靚媽嘅Kelly同首次當人契媽嘅Coei搞童裝舖，仲要八成自家製造，Kelly：「賣童裝好『簡單』，因為香港嘅管制亦好『簡單』！」不過要賣良心童裝就唔多簡單，堅持宗旨，一開舖先輸廿萬。
記者：朱崇德
攝影：陳盛臣
女兒當首席驗貨員
一踏入位於奧海城的店舖，歲半小公關Hailey即以甜笑來迎接！Kelly：「店名叫Hailey's就係要有如對女兒一樣，將最好嘅嘢帶畀其他小朋友！」店中衫褲八成自家出品，每款只有五十件。Kelly媽攞起一件衫，小Hailey馬上喊Model、Model想要穿上：「我賣嘅衫Hailey全部試着過，佢係我哋嘅品質檢測員，剪裁唔舒服、設計唔方便，都係從現實生活驗證出嚟！」
無良廠商無法無天
緊貼世界工廠，生產線難免北移：「公司有四個合夥人，曾經為香港製造定中國製造鬧得面紅耳熱！」不過，「廠方同我哋講爭咩吖，英、韓、日製造牌佢哋有齊，想標乜嘢產地都無問題！我哋即刻停止同佢哋合作，輾轉試過五、六間先搵到合適廠商！」
講良心先輸廿萬
全店童衫100%全棉，標榜天然舒適：「我哋上過香港通用公證行、Intertek等紡織品測試實驗室聽講座，想幫出品攞香港認證，兩邊嘅答覆都係只有英、美、日等地有安全測試，香港根本無！」不過為咗細路着想，出品都做到無鎳、無鉛、無重金屬：「雖然用上最上等原材料同安全工序，不過經驗所限，出貨後仍發現有金屬啪鈕過硬同衫身有褪色問題，雖然唔會構成直接危險，最終決定唔上架，未開舖就損手廿萬貨錢！」
着衫都要玩益智
小朋友出生頭幾年吸收力強，Kelly話：「唔明大部份童裝點解只着重款式而唔加入啟智元素？」於是自家出品Hailey&Friends系列，將眼耳口鼻手五感變卡通人物設計童裝，仲製作益智小遊戲上載自家店舖網址，俾小朋友邊玩邊刺激感官，遲吓仲諗住出埋App，全方位照顧小朋友需要！」
靚媽推介
Hailey's（23283221）
網址： http://www.haileyshop.com