《哈利》限定版迅斷 網民轉搶德版

《哈利》限定版迅斷 網民轉搶德版

追蹤多年嘅《哈利》終於結局!碟舖老闆話,唔止劇情多人討論,外國版Blu-ray,甚至本港推出嘅200套珍藏相冊連DVD,更已被賣個清光!搶唔到限量版,粉絲近日轉移視線,德版鐵盒裝BD成為最新追購目標,計我話,買行貨睇完套戲,隨即開動PS3試打附送嘅體驗版遊戲,咁咪仲過癮!

記者:陳國輝

鐵盒夠珍貴

劇情當然重要,但十居其九嘅《哈利》粉絲已經睇過原著,倒不如搶購珍藏限量版影碟!其實,港版已經好禮待大家,皆因Blu-ray講緊都有3個不同版本,包括雙碟、3D+2D碟,以及1至8集套裝,等你由頭煲到尾!但係,最近喺影音討論區,好多網友仲想訂購德版鐵盒裝,無他,貪佢夠珍貴,就算無中文字幕、無3D亦唔緊要,難得佢採用超實淨鐵盒,收藏容易,加上港版、英版無類似包裝推出,更見德版矜貴之處。

■英版跟港版一樣,推出三款BD版,12月正式發售。

■討論區有網友提議,集體訂購剛返貨嘅德版鐵盒裝。

■據聞48頁珍藏相冊連DVD套裝,全城200套已經賣光。

■日版都玩Gimmick,附送印有11位角色嘅Folder。

睇完玩LEGO遊戲

好多網友認為除咗第一集,大部份劇情也欠緊張,直至結局篇《死神的聖物2》,才欣賞到震撼同埋精采嘅特技場面,事實又係咪咁?留待各位買碟引證。值得一提係,呢集結合眾多靚景兼CG猛獸;畫面方面,例如洞穴內嘅層次和暗位,表現出高度細緻,而音效上就採用DTS-HDMasterAudio5.1,尤係當守護古靈閣嘅瞎眼龍出場嗰陣,噴出火燄嘅低頻效果,以及哈利仔施展魔法嗰一刻,感受到唔錯嘅環迴效果。
Bonus由一隻獨立Blu-ray包辦,特別收錄咗「80分鐘電影全面睇模式」、製作特輯、刪剪片段以及作者羅林專訪等,加埋超過兩小時,啱晒粉絲煲完劇情之後,再翻煲戲院都無嘅幕後片段。印象最深係隨3D+2D版附送嘅PS3遊戲《LEGOHarryPotter:Years5-7》,雖然係體驗版,玩唔晒所有內容,但由你控制LEGO哈利仔,四圍施魔法殺敵,如果你之前曾經玩過LEGO版《奪寶奇兵》或者《星球大戰》嘅話,肯定會俾呢個可愛Look吸引到你。

■哈利仔班同學變晒做LEGO人,勁Cutie。

■操作比一般動作遊戲更簡單,小朋友一學就曉。

■Bonus收錄哈利仔小時候片段,值得粉絲回味。

■Bonus內有介紹羅林新網頁,Fans必睇。

■洞穴內放滿珍貴物品,較暗環境下也很細緻。

《哈利波特:死神的聖物2》BD

特別收錄:80分鐘電影全面睇模式、告別霍格華茲、刪剪片段、PS3遊戲《LEGOHarryPotter:Years5-7》體驗版

■$239(雙碟版)/$299(3D+2D版)/$1,499(1-8全集套裝)