明年係大選年，好多國家有總統與國會選舉，小小香港也有特首選舉，左丁山呢排早上睇霍士電視，有好多共和黨總統初選嘅報導與評論，小布殊軍師KarlRove、克林頓軍師DickMorris係霍士電視特約評論員，日日出鏡講共和黨初選，分析形勢，呢兩位係一九九二至二○○八年期間美國最有權謀及影響力嘅政治策略師，聽佢地嘅評論，可能勝過在大學上課，而且佢兩位有充份實戰及選舉成功經驗，並非只識理論嘅大學教授，見識係唔同啲嘅。
呢日有一個節目評價各位初選候選人，搵埋永利賭場大老闆SteveWynn做嘉賓，主持人問佢：「好多人認為HermanCain完全唔識外交，講中東講到錯晒，不宜入主白宮，你認為點？」Wynn又答得妙：「外交我都唔識，但最識外交嘅基辛格博士同我一個好朋友講過，白宮主人最緊要有決斷力，聽意見，夠可靠，識唔識外交，一啲都唔緊要。國際情況太複雜，日日轉變，時時不同，每一件事都要搵專家分析，譬如蘇聯專家、日本專家、中東專家、中國專家等等，總統只要肯聽佢地意見，作決定就得嘞，自己唔駛花精神去研究每一個國家嘅問題與美國利益嘅！」
咦，基辛格果然睇得通透，卡達總統日日做朝七晚十一，將國家內政與外交搞到亂七八糟，反而老人總統列根下午五時後就唔理事，竟可以對外拖垮蘇聯，對內制服滯脹，創造就業，美股開始咗二十幾年嘅大牛市。原因好簡單啫，譬如漢高祖劉邦講過，佢自己計謀策略不如張良，調兵遣將不如韓信，後勤補給不如蕭何，論陣上決鬥，項羽一隻手都可以斬死劉邦㖭，劉邦有乜嘢叻？咪叻在張良韓信蕭何都甘心做佢手下，為佢所用囉。列根其實就係美國劉邦，願意聆聽他人意見，放心放手讓內閣部長辦份內事，唔似得花生佬總統咁自以為聰明勤力，樣樣都要micro-management，管到實。小布殊在耶魯讀書成績係C，遠不如爸爸老布殊咁聰明能幹，但佢做咗兩樣總統爸爸做唔到嘅事，就係連任總統與拉低薩達姆，原因就係佢有一批富於經驗嘅能人！世事往往如此，聰明反被聰明誤，IQ爆棚，因太富於自信，欠缺親和力也，未必做得成領導人。