網壇天王費達拿今年成績唔算太好，不過嚟到年尾一嘢反底，連贏瑞士室內網賽、巴黎大師賽同ATP年終賽。而F1車手韋伯今年成為紅牛隊友維特爾影子，到咗最後一站巴西站終於贏到。兩個都喺年尾回勇，今次仲唔係「衰家食尾糊」？
費達拿年終賽稱王
今年4個大滿貫，費達拿一個都攞唔到，仲要做咗9個月「冠軍絕緣體」。所有人都覺得費天王冇貨派「不行鳥」，係時候諗下掛拍後路。小休一輪後，費天王喺自己家鄉贏咗瑞士室內網賽冠軍。可能你會諗，佢係因為所有競爭對手傷晒嘅情況下，先贏到個盃仔；不過，巴黎大師賽佢打贏之前喺溫布頓擊敗佢嘅泰桑高，首次拎到呢項比賽冠軍，都算回勇。而佢喺ATP年終賽請宿敵拿度食蛋，更可以算係佢反底代表作。禮拜日佢以6:3、6:7、6:3，今年第2次砌低泰桑高捧盃，執成1,200萬港元；賽後佢話自己勁攰：「今日勁開心，而且仲好攰，因為泰桑高太好活力，差啲吸乾我咁滯。」佢仲話想拎奧運金牌，不過我求大俠最怕佢要再一次放棄4大滿貫嚟成全自己。
韋伯贏F1巴西尾站
今年齋到唔恨嘅F1，一早已經畀維特爾放到冇影，一眾觀眾睇佢點贏睇到瞓着。而佢隊友韋伯一直嘈車隊偏心，錫晒維特爾，搞到之前18個分站成日做二奶，畀人笑「二奶命」。好在個天冇忘記默默耕耘嘅韋伯，星期日巴西站係今年最後一站，維特爾架戰車波箱發生問題，令到韋伯終於贏到今年第一個分站冠軍。賽後佢寄望下年成績會更好：「今年開個頭開得好曳，不過我諗下季會比今年更好。」韋伯，希望你做得到啦！