蔡楓華（Ken）今日51歲生日，噚日佢同近百名fans喺旺角一間酒店舉行生日會，戴住Cap帽黑超便服嘅阿Ken出現，現場女fans即尖叫起哄放紙炮，車淑梅仲上台獻吻。收過fans送嘅金鏈同花之後，阿Ken好感觸咁講：「好多人覺得你哋鍾意我係有問題好儍，但我會令佢哋改變。」
預告紅館騷肌
講到生日願望，阿Ken希望明年4月7號紅館演唱會可以叫好叫座，而今次演唱會係由張耀榮同林建名主辦，阿Ken話家已開始籌備，初步決定開四面台，仲揀咗六十幾首歌。就快達成紅館夢，阿Ken話：「好多嘢想做，其中一樣係完場時親吻全場觀眾，我會開始做運動，睇吓到時有冇6、7嚿腹肌除吓衫，講吓笑啫。」
會唔會搵番復出演唱會搞手盧敏儀幫忙？因為當日傳佢哋不歡而散，阿Ken話：「叫咗張生同佢哋講，佢哋話唔得閒唔嚟，自從上次廣州演唱會之後都冇聯絡過。」至於歌酬，阿Ken話同主辦一講幾多錢，主辦就答應，不過阿Ken聲稱歌酬其次，今次係佢還番畀歌迷嘅演唱會。