九把刀執導嘅《那些年，我們一起追的女孩》，雖然喺金馬獎只憑柯震東贏到新人獎，但部戲喺香港票房繼續獨領風騷，截至前日累積票房約5,741萬，如果計埋噚日票房，呢部戲應該會取代成龍《警察故事4之簡單任務》嘅5,752萬票房，成為香港歷年華語片票房榜第3位，睇走勢仲分分鐘會過埋周星馳嘅《功夫》創下嘅6,128萬票房，成為開埠以嚟最高票房華語片。同時，中影來年1月會喺內地發行《那些年》，但屆時戲中打手槍等露骨戲將被刪剪。
栢芝11日收32萬
講開票房，張栢芝演嘅《楊門女將之軍令如山》喺香港上咗11日，累積票房只有32萬，但栢芝要收成千萬片酬，點同片商交代？票房同樣慘淡嘅有劉鎮偉部《東西成就2011》，上咗4日收47萬。
九把刀噚日嚟咗香港出席中文大學嘅座談會，個會堂可以容納400人，結果反應熱烈，全場爆滿之餘，有啲學生要坐樓梯聽佢講嘢，佢一出現場，全場更起哄拍掌。
另外，九把刀之前喺blog話首次逛香港高登討論區，覺得好過癮：「好多字都看不懂，邊看邊猜，真的是津津有味。」不過高登仔就笑九把刀應該睇唔明「粗口」暗語，成日「Hi前Hi後」，仲以為香港人好有禮貌㖭！