老同學回港一行，同班同學盡出，都只係得寥寥數人，細數之下，原來居住於多倫多或溫哥華之同學，仲多過畢業後留港不移民嘅同學。此乃一個時代之象徵，天安門六四事件影響咗兩代人之命運。
點解留港之肥仔Ｃ唔嚟呢？公司Ｎ話肥仔Ｃ丁父憂，不便參加飯局。肥仔Ｃ因父親養病逝世之事，已變成瘦仔，但父親留下幾個銅鑼灣商舖，講銀紙就係名副其實肥仔，乜唔係啫，閒閒地一個地舖可以收租三十至五十萬元一個月，食肆爭住租，做業主嘅直情係坐地分肥。何解食肆湧埋嚟？公子Ｎ話：「皆因啲品牌珠寶鐘錶舖閒閒地可以每月付租百五萬至三百萬，視乎地點與面積而定，老牌食肆有客路，本可以一路賺錢嘅，但唔好彩突然租約將滿之際，有鐘錶珠寶店願出百幾萬租金一個月，業主仲唔趕你走咩。肥仔Ｃ嘅地舖位於冇咁人氣旺嘅街道，但食肆熟客可以行多幾步就搵到，冇乜所謂呢，叫租三五十萬仍然大受歡迎！」
以新貨代舊貨（如iPhone取代傳統手機），可稱之為替代需求（replacementdemand），傳統手機唔夠潮，被淘汰，打死無悔；而珠寶鐘錶店在旺區趕走茶餐廳食肆，並非食肆不受歡迎，而係前者貨物售價高昂，利錢極深，可以付出更高租金，故可以在大街大巷大商場取代（displace）食肆。林奮強近月到處演講，指香港應興建商場及甲級商厦，以應付呢類displacementdemand，否則好多可以提供就業，仍受市民歡迎嘅行業會被頂級高昂租金逼到執笠結業，對市民、對整體經濟並無好處。
但講來講去，政府仍然唔明，講東九龍起動喎，當然冇人反對，但如果大陸遊客，外來遊客係鍾意在中環、油尖旺銅鑼灣活動嘅話，呢啲地區，唔通就唔需要新寫字樓新商場？他日東九龍如何活躍，中環仍然是中環，需求永在，中環需要新寫字樓、新商場，中長期嚟講，啲停車場應加快拆卸重建（如林士街、天星），當務之急就係加快拆建政府合署西翼，不要夜長夢多。