英超點解咁受歡迎？除咗因為球星多水準高，仲因為夠「神奇」。好似前晚啲波咁，曼聯就俾個球證同旁證搞到唔見咗兩分，慘被紐卡素逼和1:1。阿仙奴亦一樣，佢哋嘅後衞華美倫明明入兩粒，但都打和來訪嘅富咸1:1。
車仔破狼波亞斯吹水
乜嘢叫做大言不慚？睇車路士領隊波亞斯就知啦！之前車仔喺英超同埋歐聯係咁失分，搞到今季先入主做車仔教頭嘅波亞斯聞到魷魚香。車仔喺上周六主場對住弱旅狼隊贏3:0，計正踢得唔算太好，似「反底」居多，而且球隊贏波後都仲係排英超第5；但係，呢名葡萄牙少帥賽後就盡顯「摩連奴二世」本色，話堅信球隊可以贏得今季英超錦標喎，真係超吹水。
艾迪巴約「熱」爆入兩粒
多哥前鋒艾迪巴約雖然可以話已經被曼城放棄，但佢近期踢爭氣波，喺上周六熱刺訪西布朗時，就繼前仗梅開二度後，又再次個人入兩球，幫球隊贏3:1。之前熱刺5次訪西布朗都未贏過，而賽前又突然傳出中場雲達華治唔踢得，搞到熱刺嘅單W由初盤1.78倍冷至臨場嘅1.88倍，但有艾迪巴約，使乜驚？熱刺照贏！唔怪得最近傳出，連利物浦都有興趣羅致佢啦！
華美倫「梅開二度」慘情
阿仙奴前晚喺英超夜場迎戰富咸，連續5場聯賽入波兼喺對上兩場比賽都梅開二度嘅尹佩斯，終於斷纜冇波入，但佢隊友華美倫就「梅開二度」。兵工廠球迷咪咁開心，事關呢位比利時國腳後衞第一球係「烏龍」，喺65分鐘一時大意，將個波送入自己龍門；好彩佢喺完場前8分鐘，頭槌建功幫球隊扳平1:1，阿仙奴先唔使喺主場輸波，不過聯賽5連勝走勢就斷咗。
布朗出醜玩謝布魯士
幾時都話布朗係計時炸彈，今次佢就炸死新特蘭。前晚新特蘭喺英超主場鬥韋根，布朗喺補時3分鐘控唔定門將基倫韋斯活特嘅解圍波，俾韋根球員搶咗，最後由迪山度射成2:1完場。布朗累新特蘭臨尾香，亦令領隊布魯士嘅帥位岌岌可危，成為被炒領隊大熱，其中喺威廉希爾就熱到得2.38倍；之前話今季英超有可能喺聖誕及新年前都冇領隊被踢走，家陣睇嚟好難囉！
