39歲趙學而昨日下嫁40歲建築師Alan（基哥），正式成為基嫂！好命婆黎瑞恩前晚為新娘子進行上頭儀式，富婆甘比一家到賀，天王陳奕迅（Eason）首次擔任伴郎被玩殘，在99秒內飲9罐可樂及孖蒸，又要穿底褲扮超人，他笑言：「結婚都冇咁辛苦！」
學而與老公Alan結束八年愛情長跑，昨日下午5時於香港仔珍寶海鮮舫進行結婚註冊儀式，一對新人相當低調及保密，下午4時15分才現身碼頭，兩人沒接受訪問直接登船趕往婚禮場地。
露天舢舨註冊
下午5時35分一對新人在海鮮舫露天舢舨完成註冊儀式，學而穿上白色婚紗，Alan穿上禮服，在眾賓客祝福和歡呼下，學而從此成為基嫂，而昨日到賀嘉賓包括甘比與女兒劉秀樺、媽咪及妹妹，甘比還拖着一個男仔。另外好友何超儀、徐濠縈、黃偉文等赴宴。前晚上頭儀式由好命婆黎瑞恩為學而上頭，祝福她與Alan白頭到老。
林一峰、林二汶、劉浩龍擔任兄弟，Eason出任伴郎，廖碧兒任姊妹團，眾人大爆接新娘時玩新郎過程，一峰及二汶說：「要四個兄弟喺99秒內飲9罐可樂，仲有9杯唔同味道調味料，甜酸苦辣乜都有。」
穿着禮服、戴上黑超的伴郎Eason見到記者即嗌眼瞓，還迷迷糊糊笑說：「今朝早8、9點去接新娘，好攰，99秒要飲晒汽水，我都飲咗兩罐，飲完仲要食辣嘢、飲孖蒸，12點已經醉晒好high，仲要做瑜伽、扮超人，將條底褲着喺外面，咁大個仔都未試過，我結婚時，求其行入去（教堂）之嘛，邊有咁辛苦，不過我一定會撐到尾。」
包保鮮紙瞓覺
Eason見到一對新人結婚好開心，他踢爆學而冇喊，問到學而的老公全名？他爽快地大爆：「叫佢做基哥喇，叫學而做基嫂喇！嫁到畀佢（Alan）開心嘅，我同佢老公係31年街坊，學而就識咗十幾年，之前都唔知佢哋拍拖，睇報紙先知係我個friend。」問他如何教一對新人夫妻相處之道？他樣衰衰說：「保持距離，唔好見咁多，瞓覺用保鮮紙，包全身，保持新鮮。」廖碧兒則爆學而老公姓蘇。
採訪：文國駿 攝影：葉君海