政界噚日有挺振英大會，財金界都唔弱，今日會有挺彤叔大會，就係周大福珠寶嘅投資者推介會。華華收到風，雖然周大福最後都冇基礎投資者，但彤叔鄭裕彤一眾好友今日會親自撐場。
先數班富豪老死，排名不分先後，有華置（127）主席劉鑾雄、賭王四太梁安琪、恒大（3333）主席許加印、麗新發展（488）主席林建岳、渝港地產（1224）主席張松橋、金利豐（1031）大股東朱太李月華、星島（1105）主席何柱國，同英皇集團大股東楊受成等。
大孖沙畀晒面
除咗班大孖沙，同彤叔關係非比尋常嘅平保（2318），今日當然有高層畀面出席，聽講話其他講得出名嘅大fund，都覆咗話今日有代表出席。
個市咁chok，歐洲又好似唔係好掂，為確保周大福順利上市，唔知彤叔呢班友好，除咗撐場做生招牌，會唔會認購返多少呢。