老同學夫婦每年呢個時候回港一行，順便到大陸一行，今次係去上海與雲南，玩完之後，返到香港，搵老同學一聚，在上海總會吃晚飯。今年回港有驚喜噃，兩人雖是加拿大籍，但持有三粒星香港永久居民身份證，攞埋香港長者咭，每人獲派六千元，雖然唔夠往返多倫多機票之用，但一筆意外之錢，總係令人高興嘅！唔怪得有一個調查顯示，香港人在2011年最開心之第一件事就係政府派錢六千大元，令香港開心指數上升。不過明年唔好唔開心呀，各個政黨都反對明年再派錢，曾財爺今年其實係被政黨逼迫，先至派錢嘅。依家政黨反對派錢，正中下懷，出年一定唔會再派。
成班校友一齊吃過蟹粉小籠包，客套懷舊說話完畢，以前係賓架，依家轉行做地產嘅公子N又要講特首選舉，咁鬼悶，講嚟做乜呀！但公子N話到：「佢搞八萬五，搞到我有親戚賣樓賣唔切而破產，唔記住佢至奇。」哎吔吔，又關佢事，原來振英哥要為八萬五負責一事，深入民心，水洗都唔清，佢解釋極都無人理會。
次日上午，老朋友披圖來電，指本欄於十一月二十一日講「無敵居屋」有如下一段：「每件事都有個背景，呢啲公屋居屋乃當年八萬五下嘅產品，王䓪鳴係房委會主席時期之傑作，但整個八萬五政策之後，主要策劃人士並非王䓪鳴，而疑似係即將宣佈競選特首之振英哥。」
披圖話咁樣對佢好友振英哥唔公道，佢已向振英哥反映，並且傳來振英哥之電郵：
"Hegothisfactswrong.The85,200housingtargetwassetinearly1997bythethengovernment.IhaveawebsitelinkthatIcansendyouthatshowsthelongtermhousingstrategyreportpublishedbyChrisPattenandDominicWong.
HeisalsowrongonStanley.Theprojectwasconceivedalongtimebefore1997.Itprobablywentbackallthewaytothe1980's."（按：He即是左丁山）
振英哥話85,200（佢好仔細，講明係八萬五千二百）個住宅單位係九七前彭定康與黃星華訂下嘅。赤柱居屋公屋更係遠在1980年代已開始策劃。振英哥講得好清楚，左丁山冇弄清楚事實，就將八萬五「歸功」於佢，有必要澄清，黃星華與肥彭先至係八萬五嘅發起人！