同一招用喺聖鬥士身上係冇用嘅！但用喺我哋呢啲凡人身上就絕對有效。當年Fans狂搶聖衣神話Figure，今次出Game，限量版跟隻黃金星矢Figure，即時順勢炒上二千！大拿拿兩張金牛，依然有價有市，似乎呢一集金牛座相當兇狠吓喎！
記者：韓繼聰
攝影：陳大文
貨少 限量版高上二千
試問有幾多個廿到尾、三字頭嘅男生，未試過一邊出拳，一邊嗌「天馬流星拳」？所以《聖鬥士星矢戰記》一早已經俾一眾Fans煲到行晒，成為本年度壓軸期待大作。星矢效應加上Fans望穿秋水嘅情緒，遊戲大賣兼有炒味，已經係意料中事。而且代理商來貨不足，平均每間舖只能分配到訂貨量七成左右，有買真係要趁手。I-Gamer店員阿良就表示：「入貨50隻，第一日已賣剩2隻，第二批都未知幾時返，個價可能再上。」訪問當日，普通版由原價$529微升$550。而隨Game附送黃金星矢的限量版，唔係間間舖有現貨，且大部份早被熟客訂購一空。到黃金商場問價，原售$1,059限量版已炒上$1,888，網上更有賣家開價$2,000，絕對係有價有市！講到限量版，黃金天馬座公仔造工算係相當唔錯，頗具收藏價值，同時更附有下載卡，可於遊戲中下載黃金版星矢，索性實體虛擬齊齊擁有。
無雙激戰 原味細節
遊戲以「無雙」形式進行，玩家利用聖鬥士雙拳，力戰大量嘍囉及Boss。故事當然以膾炙人口的黃金十二宮為背景，五位青銅聖鬥士越級硬闖的情節，挑完一眾恩師，再戰亦正亦邪嘅教皇，諗起都熱血沸騰！不過就有玩家抱怨，話打Boss都有嘍囉擾攘，唔多忠於原著喎。筆者亦有同感，雖然此舉令遊戲刺激度增加，但就少了原作中，男人單打獨鬥嘅熱血浪漫，呢點就比《北斗無雙》稍遜喇。
其實也不得不讚遊戲加入不少忠於原作細節，例如爆聖衣燃燒小宇宙，攻防力雖然下降，但小宇宙會急劇增加，勁好多！另外，令星矢失去六感依然能繼續戰鬥嘅第七感亦有出現，發動後敵人速度會減慢，絕對係反擊好機會。二人合作時，亦可篤同伴「真央點」止血，而華麗嘅超必殺技、成長升級、收集動畫及人物模型等，當然都係必備元素。雖然網上已有玩家話遊戲有啲悶兼打嘍囉打到暈，但大家一樣繼續邊怨邊煲。無計，八十後男生情意結，唔係個個明白的！
《聖鬥士星矢戰記》
機種：PS3
類型：動作
原價：$529（普通版）
$1,059（限量版）
查詢：I-Gamer（27253338）