今個星期同有線《怪談》師傅陳譽之走入錦綉花園睇風水：「2012年，J地段財運會急升！」啱啱入手呢度嘅屋主自然開心：「不過我計過間屋財位喺正後花園！」無用？錯晒！陳師傅話多啲帶朋友嚟聯誼BBQ、打吓麻雀仔，隨時橫財、正財兩邊吸！
記者：朱崇德
攝影：伍慶泉
Models:YoYo&LaYing@GMEModels
坐財位工作 趨旺運勢
認識陳師傅，好多人都由佢成為蘇民峰入室弟子、師承風水命理正統開始，但大家未必知佢其實仲集有幾家大成！分別有東南亞聲名顯赫黑降師傅阿贊TomDum學習泰國法科，同江西萬壽宮取得淨明宗壇傳度法牒。
「如果根據泰國法科，想進一步趨旺花園呢個財位，可以請一尊招財女神，好彩屋主呢度有個簷篷位，唔會日曬雨淋，想供奉亦無問題！」陳師傅仲指出，好多人未必留意到錦綉花園大多為複式單位：「其實上到二樓，對應花園個財位，正好就係客房，所以二樓客房呢度亦係財位，建議可改建成書房，多啲喺財位工作，亦有利趨旺運勢！」
泰式和合瓶提升人緣
全屋850呎真係毫無破綻，樣樣都好到無嘢講？「咁又唔係！入門口一列地方，2012年會有少少問題！」大門鐵閘對正東南，正正係明年嘅病災位，屋主有乜頭暈身㷫奇難雜症，完全可以惟佢是問。「我睇間屋平面圖時，就發現呢個問題，所以特別預備了一個符葫蘆俾屋主！」將符葫蘆掛於大門鐵閘就有助化解煞氣。此外，家中的廚房亦正正對住大門，由於有爐火「加旺」，「病災」亦有可能越演越烈：「廚房處理同大門有啲唔同，只要放一樽粗鹽在爐火旁就可淨化病危！」
明年桃花位在南方，但極唔好彩地竟落在廚房側的廁所內：「呢個就係所謂爛桃花，影響所及，係男女戶主都有機會遇上外遇同婚外情等問題！」一般傳統中式做法，係會用鐵銅公雞擺設「啄」斷爛桃花，不過主修姻緣和合嘅陳師傅有另一番見解：「我會建議放泰式和合瓶，和合有和諧、和睦、和氣、和順同相親嘅意思，只要和合順意，就能結良緣，增加職場人緣，人際關係提升就更得貴人相助！」
