許冠英本月8號因心臟病發去世，享年65歲。噚日許家為阿英喺大圍寶福紀念館設靈，今日舉殯，骨灰會海葬。
靈堂清雅簡潔，白色鮮花配米白絹布佈置，遺照選用阿英一張穿上牛仔恤衫的相，靈位上方掛着「永遠懷念」牌匾，兩旁則有對白底黑邊白鷹圖案。阿英嘅靈位放咗個香爐，場內播放阿英生前拍過嘅電影《花田囍事》、《合家歡》、《雞同鴨講》等，仲有佢嘅金曲。
靈堂門外有四位保安把守，門內再放置屏風遮擋，接待處放了阿英生前最愛的鷹雕塑，阿英生前不少好友送上悼念花牌，阿英傳聞中嘅日籍女友Kayori未見出現，但收到一個疑是她與一班朋友夾份送的花牌，而疑似阿英初戀女友孫寶玲就有到場。
阿Sam一早到場
阿英大哥許冠文一家四口、二哥許冠武、細佬許冠傑嘅細仔許懷谷及太太先後抵達靈堂，而同阿英感情最深嘅細佬許冠傑（阿Sam）一早已到場打點。
唔少圈中好友到靈堂致祭，包括廖碧兒、莊思敏、吳雨同何禮全等，大家離開時都神情哀傷眼紅紅，高志森話：「瞻仰咗阿英遺容，好安詳，大家都好傷心，冇諗過佢咁快走，好唔捨得，喺場內睇番佢嘅片段，好似係噚日嘅事。」馮仁昭問見唔見到阿Sam，高志森就話：「見唔到，佢哋話阿Sam之前已經嚟咗。」
