世事無絕對，當所有人都覺得今年應該冇得睇NBA嘅時候，勞資雙方竟然靜靜雞喺星期一同意再傾過，希望可以喺聖誕開到波！點解雙方明明擘晒面，無啦啦又肯再談判？無他嘅，都係一個錢字。就算有錢如拜恩，都因運動手帶生產商PowerBalance執笠，一下子唔見咗40萬美金（約310萬港元）！你話唔重開談判，唔通坐食山崩等死咩？廣大球迷聖誕有冇禮物收，就要睇兩邊嘅造化啦。
球員解散工會之後，嗱嗱聲星期一入稟明尼蘇達州法院，告NBA壟斷。唔知係咪NBA球隊班主淆底，知道球員呢鋪唔係講笑，同日搵番班球員，話再傾吓得唔得。球員見凶到班主，梗係話冇問題啦，傾唔成咪法庭見囉。星期三晚有個知情人士走出嚟爆料：「雙方係咪約埋一齊再傾過？係。有冇咩重要進展？咁又冇。」唓，咁即係同兩星期前一啲分別都冇。
手帶商破產拜恩唔見310萬
雙方同意喺感恩節放完假後，禮拜五再傾過。點解趕得咁離譜？計我求大俠話，都係離唔開個錢字。班主唔見錢當然濕滯，不過班球員就仲甘。各位睇NBA嗰時，都一定會見到啲球星戴手帶，而著名生產商PowerBalance早前申請破產，搞到有份代言嘅快艇新人王比歷克格芬、同湖人巨星拜恩齊齊收少咗錢。
格芬都還好，只冇咗20,000美金。Kobe就慘啦，一嘢唔見40萬美金！家冇波打，佢個2,500萬美金年薪已經一毫子都收唔到，家仲要少咗40萬美金，你都唔好話唔肉赤。所以，雙方重開談判都係好事一件，傾得成就唔使再為錢煩惱，仲可以幫到班喺NBA搵食嘅周邊行業。好似人哋喺球場做廣播，因為封館一場唔見1,000美元，計吓條數，今季唔打嘅話，冇咗差不多10萬！我求大俠希望你哋勞資雙方好好地傾，唔諗吓自己，都為一班打工仔着想一吓！
兩邊人馬周五再傾
勞資雙方周五會班齊馬再傾過，因為簽約啲手續要搞成個月，所以成事嘅都要下個月25號、即係聖誕先開到波。而呢一季場數將會縮短到66場。我求大俠希望真係開得成波，咁就係最好嘅禮物啦！