乳臭未乾只有15歲的胡渭康，有幸成為組合「小虎隊」的一員，經過3年的火紅年代，至85年三子拆夥，之後他一直過着四出登台的生活，至今年才正式回歸香港樂壇明年1月推出專輯。輾轉多年，今日的他已是44歲壯男。停止漂泊回港，胡渭康的世界已不一樣，他的父母都患上腦退化症，家姐患上癌症，當年一起在樂壇成長的梅艷芳已撒手塵寰，張國榮亦騎鶴歸去，曾揸波子來救濟他與阿梅的蔡楓華亦風華不再。
撰文：陳玉琼
胡渭康（William）82年參加華星第一屆新秀歌唱大賽名落孫山，卻被華星睇中簽約，安排他與林利、蔣慶龍組成「小虎隊」，但唱片未出，蔣慶龍已宣告退出，其後孫明光替補頂上，「小虎隊」紅極一時，可惜只有三年光景，拆夥後的他漂泊於馬來西亞、台灣、大陸之間登台演唱。01至08年，胡渭康隻身移民到英國，直至兩年前，因年屆80多歲的父母同時患上腦退化症，姐夫不幸去世，連家姐也患上癌症，他放下英國的一切飛返香港，重踏故土，可惜已人面全非。
他在娛樂圈好朋友不多，闊別樂壇20多年，重出江湖，當年的好友只能在一張張發黃的舊照裏追憶，重情的他決定在1月推出回歸樂壇新碟，更會親手製作一本舊相集，追憶昔日最珍貴、最懷念的快樂日子。
一切由新秀說起……梅艷芳
胡渭康與梅艷芳在第一屆華星新秀大賽相識，當年阿梅奪金。他說：「18歲嘅阿梅一炮而紅，睇住佢成為巨星，佢係義氣仔女，試過喺ChicagoDisco因有圈中人激嬲咗一位黑幫大佬，俾成班紋身漢圍住，阿梅膽生毛，一支箭衝出去大喝『你哋想點？』大佬唔想搞大件事拉隊走。」看着阿梅的舊照，William會心微笑。「阿梅同我都好百厭，我哋去日本登台，喺酒店玩祝迷藏，我同阿梅攀出窗匿喺好窄嘅窗台，點知俾陳淑芬見到，佢我哋爬番入房之後足足教訓咗我同阿梅一個鐘。」
阿梅在03年12月30日因子宮頸癌去世，胡渭康說：「重重複複睇咗好多次阿梅臨走前舉行嘅演唱會DVD，落幕時佢擰轉身同大家揮手，好似跟大家講『我走喇』，佢同家姐梅愛芳感情好深，估唔到佢哋走上同一條路。」
難忘的一剎光輝……蔡楓華
胡渭康看着手中的一張照片，相中是青靚白淨的紅唇王子蔡楓華，一身筆挺名牌西裝，玉樹臨風。胡渭康回憶着說：「有次我喺阿梅屋企，大家都好想出街食飯，但我哋嘅身家加埋唔夠100蚊，點知呢個時候，當時紅極一時嘅蔡楓華突然打電話畀阿梅話要請阿梅食飯，我哋興奮到『Yeah』咗出聲，唔使一陣，蔡楓華揸住部波子飛車嚟接我哋，我諗蔡楓華到家都唔知道，當年嗰餐豐富晚飯，佢救濟咗我同阿梅，我同阿梅一直都好感激蔡楓華，阿梅亦好照顧同關心佢。」
此情只恨成追憶……張國榮
而03年4月1日愚人節在酒店跳樓身亡的張國榮（哥哥），胡渭康說起哥哥跟阿梅的友情深厚，他拿着一張與哥哥、阿梅、谷村新司一起晚宴的照片，這張合照胡渭康視如珍寶。他說：「同哥哥都喺華星，哥哥幾慳儉，相反阿梅次次食飯都爭埋單。有一年聖誕，哥哥《風繼續吹》大碟大賣，哥哥開心到第一次送禮物畀全公司嘅人做聖誕禮物，每一份禮物佢都花心思，每個人都度身購買禮物，仲要貴價名牌，哥哥送我一本名牌真皮記事簿，我一直當寶咁收藏。」望着相片，他一聲感嘆說：「哥哥同阿梅走嗰日，我喺英國，回港後第一時間拜哥哥，然後再去拜阿梅。」對於生死，他有自己的睇法：「每個人都會離開，我只會睇走得舒唔舒服，最緊要撇撇脫脫、快快手手。」
唱老歌
自從「小虎隊」後，胡渭康已20多年沒有出過唱片，這次回歸樂壇推出專輯，都會帶點回顧的意味，除了新歌，他會翻唱哥哥的《為你鍾情》，亦會將他曾唱過的卡通片主題曲《黃金戰士》、《怪物小王子》、《電子神童》、《小小朋友仔》等串成一首medly，而主打歌《頑童》則是他送給患上腦退化症的父母，以歌訴衷情。