《蘋果》報道市場推廣公司IE游說年輕人加入傳銷及層壓式推銷、教唆少男少女提供虛假資料向財務公司借錢後,本報陸續收到多名受害人及前職員報料和求助。剛滿18歲的April在IE日做12小時,每月收入不夠維生,「我哋要幫公司畀埋租金,又要畀locker錢,被迫自費上推銷課程」。
少女落叠欠到一身債
19歲的廖小姐說:「之前話每賣一張coupon可以分到250蚊佣金,做落先知佢哋會用唔同嘅理由要你同上線拆佣,賣一張單得百幾蚊,車錢同飯錢都蝕埋,每月搵得千幾蚊,唔好話還債」。
IE推銷的產品包括秀身文化療程及巧容化妝學校課程,巧容股東之一李詩韻曾向受影響者公開道歉及承諾退還款項,惟記者跟隨其中一名受害人上門要求退款時卻遭刁難,職員只叫事主填寫退款申請書,拒絕承諾退款,「幾個月前都填過一次,之後佢哋回信話唔會退,今次我知李詩韻話肯退款先再上嚟,點知又係咁耍我,根本就係講大話」。至今已一星期,其申請依然石沉大海。本報為此向李詩韻查證,她堅稱只要持有單據便可獲退款。《蘋果》記者