吳雨霏（Kary）今年轉投環球唱片，臨近年尾才出新碟，似乎有點蝕底。幸好其新歌《我本人》口碑不俗，增添信心，年尾的頒獎禮能否奪獎，她表示不會看得太重，最重要是遇到好歌。Kary又強調現時單身：「唔想畀感情影響到工作，之前真係拍拖冇心機做嘢，覺得自己浪費咗啲時間。」
自從女子組合Cookies解散後，Kary在歌唱事業的發展是最理想的一個，今年6月與金牌大風的合約完結，之後加入環球唱片。Kary坦言因為五大唱片公司與無綫的關係，亦考慮了一段時間，她說：「呢個係一個好重要嘅考慮因素之一，咁我份人好樂觀，覺得終有一日會冇事。我覺得自己都係音樂行先，去唔到一個電視台，總有其他方法去宣傳。」
多謝老闆照顧
加盟新公司未免會有少許徬徨，Kary表示幸好得到老闆Duncan（黃劍濤）的鼓勵，她說：「佢真係好似爸爸一樣，成日都會關心我、問候我做嘢辛唔辛苦，又會成日同我傾吓我嘅路向應該點，拍MV又會親自嚟為我打氣。而且所有同事都好好，知我今年做嘢時間慢咗，呢幾個月都幫我追返晒，好快就出到碟。」
當新歌《我本人》播出後，外界的反應不俗，Kary即時放下心頭大石，她說：「遇到一首好歌真係唔易，至於你問我想唔想呢首歌得獎，我當然係想啦，不過最重要係大家對我嘅歌曲有所認同。」事業上有一個新開始，未知感情上又會否一樣？Kary笑着說：「冇呀，家真係冇拍拖呀，就算有都唔會好似以前咁公開啦，我真係唔想畀感情影響到工作，之前真係拍拖冇心機做嘢，覺得自己浪費咗啲時間。」
放紙炮嚇破膽
另外，Kary日前以黑衣成熟look拍攝新歌《歸宿》MV，現場導演安排放紙炮，但每當爆紙炮時都發出很大聲音，坐在旁邊的Kary被嚇到尖叫兼跌落地，但在旁的工作人員見狀笑到肚痛，雖然被巨響嚇怕，但Kary依然頂硬上拍攝，並笑言爆炸聲差點令自己精神崩潰，更笑稱要將《歸宿》改名為《龜縮》應景。
採訪：李珮洳 攝影：黃偉雄
化妝：Cyrus（BeautyTech）
髮型：Manho（HipHairCulture）
服裝提供：Levi's、H&M