噚日「2011亞洲小姐競選」喺亞視總台搞淘汰賽，揀咗8位港澳特區賽區佳麗進入大中華總決賽，喺淘汰賽前夕，前晚高齡佳麗3號陳麗文就約咗14號胡主莉同女伴，去老蘭獵佬。
前晚39歲嘅陳麗文喺夜店坐低冇耐就除外套，之後着小背心跳咗一輪舞，再向一個貌似盧海鵬嘅中年洋漢出擊，跟住大跳辣身舞，跳咗冇耐男方索晒氣，意猶未盡嘅陳麗文，轉頭又出擊冧另一個中坑、高腳王祖藍共舞，佢哋當正舞池係私人舞台，搞到其他人客尖叫和應。
康馨月藐嘴
講番噚日個淘汰賽，15位佳麗着泳衣見評判後，陳麗文先拔頭籌奪3獎，但無助佢入圍，最後入圍嘅有1號王家敏、2號周嘉莉、4號林微熹、6號馮雪冰、10號梁樂思、13號馮虞軒、14號胡主莉同15號楊鑫婷，之後見落選嘅7號康馨月藐嘴。佢又話12號陳立筠喺後台勁喊。被指犯眾憎嘅8號施熙瑜亦被淘汰，佢話：「冇失望，落選同年紀大無關，如果唔係都唔會俾我入圍，我好介意俾人話因操行唔好落選。」