十一月二十一日，蘋果「蘋論」講醫生不會說出的話，簡單啲講，就係醫生並非反對海外醫生來港，而係恐怕大陸醫生來港，呢啲說話講出來就係政治不正確，並且會招來平機會嘅責難。呢啲事情唔使咁扭擰啦，不如講到明，劍橋、牛津、哈佛、耶魯、約翰霍布金斯、多倫多、麥基爾、墨爾本、雪梨等等相同相等級數醫學院畢業生可以來港執業，其餘啲呀，對唔住咯。
但係人人要假惺惺，扮專業，唔敢講到明，於是大家賺勞氣，搵交嗌。上星期碰到一位美國大學畢業嘅有名氣中環醫生，佢嘅提議又幾好噃，就係無論乜嘢地方畢業嘅醫生，包括清華、復旦，全部歡迎來港執業，但要攞牌，攞牌條件就係要通過一個統一醫生及格試，港大中大乜大都好，所有醫科畢業生一齊「會考」，以共同時間考共同科目，一視同仁，目前中大港大生分五年考五科，外國籍醫生要考中英文及臨床試，中文唔及格已經玩完，於是本地醫科生容易及格，外國籍醫生就及格率偏低，呢位美國醫生對左丁山講：「香港樣樣嘢話要講公平，實則醫生考試制度對海外醫生就絕不公平，如果要洗脫保護主義之名，我嘅方法最好！」
是否如此，要鬧過交先知，既得利益者嘅關係網千絲萬縷，邊度會輕易讓步吖。呢樣係長期鬥爭，凱因斯話過，Inthelongrun,wearealldead，故此要有短期治標方法，就係從速自海外輸入已有外地醫生牌照（不包括內地醫生）嘅醫生。第一階段以本港子弟留學外國者為優先，以暫濟燃眉之急，紓緩本地公立醫院嘅人手不足情況先。呢類醫生講明不准在外掛牌執業，為何私家醫生反對佢地免試來港，真令人不解，無怪大教授盧寵茂（港大李嘉誠醫學院外科學系系主任）都慨嘆本地醫學界有保護主義及福利主義。《信報》紀曉風指保護主義禍延特首選戰，有人威脅疑似特首候選人要炒胡定旭，將輸入海外醫生議題政治化。呢類威脅只會弄巧反拙嘅啫，唐梁兩位邊個夠膽贊成保護主義，形象必定插水。